KFCریسٹورنٹ مہر بند،90 کلو استعمال شدہ تیل ضبط

کریم نگر (منصف نیوز بیورو) محکمہ تحفظ اغذیہ کے عہدیداروں نے جمعرات 5 نومبر کو کریم نگر میں واقع کے ایف سی ریسٹورنٹ کی اچانک تنقیح کرتے ہوئے غذائی اشیاء کی تیاری میں مبینہ طور پر استعمال کیے جانے والے تقریباً 90 کلو غیر معیاری پکوان کے تیل کو ضبط کرلیا۔

یہ تنقیح فوڈ سیفٹی آفیسر انکت ریڈی کی نگرانی میں انجام دی گئی۔ اطلاعات کے مطابق عہدیداروں نے پایا کہ چکن تلنے کے لیے پہلے سے استعمال شدہ تیل کو بار بار استعمال کیا جارہا تھا۔ غذائی اشیاء کی تیاری میں استعمال ہونے والے اجزاء کے معیار پر بھی تشویش ظاہر کی گئی۔

تنقیح کے دوران ریسٹورنٹ انتظامیہ نے مبینہ طور پر عہدیداروں سے بحث و تکرار کی اور میڈیا کے نمائندوں کو احاطہ میں داخل ہونے سے روک دیا۔ اس تصادم کے بعد سیکنڈ ٹاؤن پولیس نے مداخلت کرتے ہوئے تنقیحی ٹیم کی مدد کی۔ عہدیداروں نے غذائی اشیاء اور خام مال کے نمونے حاصل کرکے جانچ کے لیے لیباریٹری روانہ کردیے۔

تنقیح کے بعد عہدیداروں نے کے ایف سی ریسٹورنٹ کو مہر بند کردیا۔ لیباریٹری رپورٹس کی بنیاد پر مزید کارروائی کی جائے گی۔ اس سے قبل حیدرآباد کے ریسٹورنٹس میں بھی تنقیح کے دوران غذائی تحفظ کے ضوابط کی اسی نوعیت کی خلاف ورزیاں سامنے آئی تھیں جہاں عہدیداروں نے زائدالمیعاد غذائی اشیاء، غیر صحت بخش کچن اور غذائی اشیاء کو غیر مناسب طریقہ سے محفوظ رکھنے کے معاملات کا پتہ چلایا تھا۔

کریم نگر کے اس واقعہ سے غذائی تحفظ کے ضوابط پر سختی سے عمل آوری اور ریسٹورنٹس کی باقاعدہ تنقیح کی ضرورت اجاگر ہوئی ہے۔ پکوان کے تیل کو بار بار گرم کرنے سے مضر صحت کیمیائی مرکبات پیدا ہوسکتے ہیں جو انسانی صحت پر منفی اثرات مرتب کرسکتے ہیں۔

صارفین کے تحفظ اور ریسٹورنٹس میں غذائی اشیاء کے معیار کو یقینی بنانے کے لیے لیباریٹری جانچ، جوابدہی اور بروقت کارروائی ضروری ہے۔