لورنس بشنوئی نیٹ ورک عالمی نشانے پر، ایف بی آئی کی اہم کارروائی

نئی دہلی :  امریکی وفاقی تحقیقاتی بیورو (ایف بی آئی) نے کینیڈا اور اسپین کے ساتھ مل کر ‘آپریشن ہارڈ بال’ کے تحت گینگسٹر لورنس بشنوئی سے جڑے مبینہ بین الاقوامی نیٹ ورک کو نشانہ بناتے ہوئے 50 سے زیادہ مقامات پر بیک وقت چھاپے مار کارروائی کی ہے۔

حکام نے بتایا کہ 24 افراد کو گرفتار کیا گیا اور امریکی عدالت میں 37 لوگوں کے خلاف فرد جرم دائر کی گئی۔ اس مبینہ نیٹ ورک پر قتل، منشیات کی اسمگلنگ اورجبراً وصولی جیسے الزامات ہیں۔

امریکی محکمہ انصاف کے مطابق فرد جرم میں یہ بھی کہا گیا ہے کہ یہ نیٹ ورک کینیڈا میں ممتاز کناڈائی سکھ علیحدگی پسند ہردیپ سنگھ نجر کے 2023 میں ہوئے قتل سے جڑی سازش میں ملوث تھا۔

اس دوران ایجنسی نے لورنس بشنوئی گینگ کے ایک اور رکن ستویر سنگھ کی گرفتاری میں مدد کرنے والی معلومات کے لیے 50 ہزار ڈالر تک کے انعام کا اعلان کیا ہے۔ وہ لورنس بشنوئی کے منظم جرائم کے گروپ کے ساتھ مبینہ طور پر جڑے ہونے کی وجہ سے مطلوب ہے۔

ایف بی آئی نے پوسٹ کیا، "ایف بی آئی نے لورنس بشنوئی کے منظم جرائم کے گروپ کے ساتھ جڑے ستویر سنگھ کی گرفتاری میں مدد کرنے والی معلومات کے لیے 50 ہزار ڈالر تک کے انعام کا اعلان کیا ہے۔”

ایف بی آئی کے مطابق، یہ گروپ جنوبی کیلیفورنیا کے ساتھ ساتھ امریکہ اور کینیڈا کے دیگر حصوں میں کئی پرتشدد مجرمانہ سرگرمیوں میں مبینہ طور پر ملوث ہے۔

ایجنسی نے کہا، "جس کسی کے پاس بھی سنگھ کی گرفتاری میں مدد کرنے والی معلومات ہو، اس سے ایجنسی سے رابطہ کرنے کی گزارش کی گئی ہے۔” ۔