ایک روپیہ میں قانونی امداد، تلنگانہ کے نوجوان نے ایپ تیارکیا، کے ٹی راما راو کی ستائش

حیدرآباد: بی آر ایس کے کارگزارصدر اور سابق وزیر کے ٹی راماراو نے سوشل میڈیا پر ایک دلچسپ پوسٹ شیئر کی۔

انہوں نے یاد دلایا کہ تلنگانہ کے سابق وزیر کے چندرشیکھرراو ہمیشہ کہا کرتے ہیں کہ عام آدمی کے مسائل حل کرنے پر ہی ٹکنالوجی کا مقصد پورا ہوتا ہے۔

کے ٹی راما راو نے کہا کہ تلنگانہ کے نوجوانوں کی تخلیقی صلاحیتوں کو ابھارنے اور انہیں باصلاحیت صنعتی کاروباری بنانے کے جذبہ کے ساتھ سابقہ بی آر ایس حکومت نے ٹی۔ہب، وی۔ہب اور ٹی۔ورکس جیسے ادارے قائم کئے تھے۔

انہی میں سے ٹی۔ہب کے تعاون سے انصاف کے لئے جدوجہد کرنے والوں کی مدد کے لئے ایک تلنگانہ نوجوان سامنے آیا ہے۔

یہ نوجوان کنڈیکا آدرش ہے، جس نے سی ایل این ایس نامی موبائل ایپلیکیشن تیار کی ہے جو صرف ایک روپیہ میں قانونی مشورے فراہم کر رہی ہے۔ یہ خدمات ملک بھر میں دستیاب ہیں اور آدرش تلنگانہ کا وقار بڑھا رہے ہیں۔

کے ٹی آر نے آدرش کو مبارکباد دیتے ہوئے کہا کہ وہ مزید کامیابیاں حاصل کریں اور اعلیٰ منازل طے کریں۔