حیدرآباد: 9 اور 10 اگست کو جامعۃ المؤمنات کی تاریخی فقہی کانفرنس، علمائے کرام اور مفتیان کی خصوصی شرکت متوقع

حیدرآباد: حیدرآباد کے علمی و دینی افق پر ایک اہم تقریب منعقد ہونے جا رہی ہے۔ جامعۃ المؤمنات مغلپورہ کے زیرِ اہتمام 9 اور 10 اگست 2025 کو شاہ جہاں فنکشن ہال، تالاب کٹہ اور اردو مسکن خلوت مبارک، حیدرآباد میں دو روزہ فقہی کانفرنس کا انعقاد کیا جا رہا ہے۔ اس کانفرنس میں ملک بھر سے ممتاز علمائے کرام، مفتیانِ عظام، محققین، اسکالرز، اسلامی خواتین کی تنظیمات اور دینی اداروں کے نمائندے بڑی تعداد میں شرکت کریں گے۔

فقہی کانفرنس کا مقصد

جامعۃ المؤمنات کے چیئرمین، مولانا مفتی ڈاکٹر حافظ محمد صابر پاشا قادری نے کہا کہ یہ کانفرنس جامعہ کے تحت قائم دارالقضاء کی 25 سالہ فقہی و شرعی خدمات کے اعتراف میں منعقد کی جا رہی ہے۔ اس موقع پر فقہ نسواں کے فروغ اور خواتین میں شرعی بصیرت کے احیاء کو مرکزی موضوع بنایا گیا ہے۔

انہوں نے کہا کہ جامعۃ المؤمنات گزشتہ ربع صدی سے خواتین کو افتاء، قضاء، شرعی رہنمائی اور درسِ نظامی کی عملی تربیت فراہم کر رہا ہے۔ یہاں سے فارغ التحصیل طالبات آج ملک و بیرونِ ملک مفتیات، عالمات، فاضلات، حافظات اور قاریات کی حیثیت سے نمایاں دینی خدمات انجام دے رہی ہیں۔

خواتین کی دینی تعلیم کا اثر

کانفرنس کے منتظمین کا کہنا ہے کہ جامعۃ المؤمنات کا بنیادی مشن صرف دینی تعلیم فراہم کرنا نہیں بلکہ خواتین کو عصرِ حاضر کے چیلنجز سے ہم آہنگ ایک باشعور داعیہ اور فقیہہ بنانا ہے تاکہ وہ گھریلو، معاشرتی اور عالمی سطح پر اصلاحِ معاشرہ اور اشاعتِ دین کا فریضہ انجام دے سکیں۔

سلور جوبلی فقہی کانفرنس کی جھلکیاں

• ممتاز مفتیانِ کرام اور فقہی ماہرین کے خصوصی خطابات
• عصر حاضر کے فقہی و فکری چیلنجز پر سیر حاصل گفتگو
• شرعی رہنمائی و اصلاحی پہلوؤں پر خصوصی سیشنز
• خواتین مفتیات کی خدمات کا اعتراف
• علمی مقالات، کتب اور فتاویٰ کی نمائش

منتظمین کے مطابق، اس فقہی کانفرنس میں ملک بھر کے 300 سے زائد ممتاز مفتیان، علماء اور خواتین مفتیات کی شرکت متوقع ہے، جو اسے علمی، فقہی اور اصلاحی اعتبار سے ایک سنگِ میل بنائے گی۔