یاقوت پورہ میں کھلا مین ہول، 6 سالہ بچی حادثہ سے بال بال بچ گئی(ویڈیو وائرل)

حیدرآباد: یاقوت پورہ کے مصروف علاقے میں آج ایک دل دہلا دینے والا واقعہ پیش آیا، جہاں ایک 6 سالہ بچی کھلے مین ہول میں گر کر حادثے کا شکار ہوتے ہوتے بچ گئی۔

تفصیلات کے مطابق، مذکورہ بچی اپنی والدہ اور بہن کے ساتھ اسکول جا رہی تھی۔ وہ اپنی والدہ اور بہن سے چند قدم آگے نکل گئی اور سڑک پر کھلے مین ہول کو نہ دیکھ سکی۔ نتیجتاً اچانک اس میں جا گری۔ تاہم خوش قسمتی سے، پیچھے چل رہی ماں نے یہ منظر فوراً دیکھ لیا اور بروقت بچی کو باہر نکال لیا۔ یوں ننھی جان کی زندگی محفوظ ہو گئی۔

اس واقعے کے بعد مقامی عوام میں سخت برہمی دیکھی گئی۔ شہریوں کا کہنا ہے کہ یہ سڑک ہمیشہ مصروف رہتی ہے، اس کے باوجود مین ہول کو کھلا چھوڑ دینا انتہائی غفلت ہے۔ عوام نے حکام سے سوال اٹھایا ہے کہ آخر کب تک پرانے شہر کے لوگ اس طرح کی لاپرواہی کی سزا بھگتتے رہیں گے؟

یہ مسئلہ صرف یاقوت پورہ تک محدود نہیں ہے، پرانے شہر کے کئی علاقوں میں بھی سڑکوں پر خطرناک گڑھے اور ٹوٹے پھوٹے مین ہول شہریوں کی زندگیوں کو خطرے میں ڈالے ہوئے ہیں۔ عوام کا کہنا ہے کہ ذمہ دار محکمے اپنی غفلت اور بےحسی میں مگن ہیں۔

واضح رہے کہ کھلا مین ہول نہ صرف حادثے کا باعث بن سکتا ہے بلکہ قیمتی جانیں بھی ضائع کر سکتا ہے۔ اب دیکھنا یہ ہے کہ حکام اس سنگین لاپرواہی پر کب عملی اقدامات کرتے ہیں۔