فرنیچر کی دکانوں میں شدید آتشزدگی، کوئی جانی نقصان نہیں

حیدرآباد: میڈچل-ملکاجگری ضلع کے باچوپلی علاقے میں واقع فرنیچر کی دکانوں میں کل دیر رات شدید آگ بھڑک اٹھی۔

پولیس اور عینی شاہدین کے مطابق، آگ پیر کی آدھی رات کے قریب پرگتی نگر کمان سے باچوپلی جانے والی مین روڈ پر ‘مائی اسپیس’ کے قریب واقع فرنیچر کی چھ دکانوں میں لگی۔

آگ کے بلند شعلوں نے تیزی سے پوری قطار کو اپنی لپیٹ میں لے لیا، جس سے مقامی لوگوں میں خوف و ہراس پھیل گیا۔ واقعے کی اطلاع ملتے ہی پولیس اہلکار اور فائر بریگیڈ کی چھ گاڑیاں موقع پر پہنچ گئیں اور کافی جدوجہد کے بعد آگ پر قابو پایا۔

مقامی افراد کے مطابق اسی علاقے میں اس سے قبل بھی اسی نوعیت کا واقعہ پیش آ چکا ہے، جس سے حفاظتی انتظامات پر سوالات اٹھ رہے ہیں۔ تاہم اس واقعے میں کوئی جانی نقصان نہیں ہوا، البتہ املاک کو بھاری نقصان پہنچا ہے۔