عمان میں رہائشی عمارت پر حملہ، دو غیر ملکی زخمی

مسقط: عمان کے شمالی علاقے میں ایک رہائشی عمارت کو نشانہ بنائے جانے کے واقعے میں دو غیر ملکی زخمی ہو گئے ہیں۔عمان کی خبر رساں ایجنسی کے مطابق حملے کے نتیجے میں زخمی ہونے والے افراد کو درمیانی نوعیت کے زخم آئے ہیں اور انہیں طبی امداد فراہم کی جا رہی ہے۔

عمانی حکام نے بتایا کہ ولایت بخا، جو آبنائے ہرمز کے قریب واقع ہے، کو نشانہ بنانے کے واقعے کی مکمل تحقیقات کی جا رہی ہیں۔

رپورٹس کے مطابق ایران نے پیر کے روز خلیجی ممالک کے خلاف اپنے حملے دوبارہ شروع کیے ہیں اور 8 اپریل کے بعد پہلی بار متحدہ عرب امارات اور عمان کو نشانہ بنایا ہے، جسے جنگ بندی کی خلاف ورزی قرار دیا جا رہا ہے۔

حکام کا کہنا ہے کہ واقعے کے محرکات اور ذمہ دار عناصر کا تعین کرنے کے لیے تحقیقات جاری ہیں، جبکہ خطے میں سیکیورٹی صورتحال پر بھی سخت نظر رکھی جا رہی ہے۔