کوکٹ پلی میں زبر دست ہنگامہ، پارکنگ کے مسئلے پر بحث کے بعد کویتا کی تلنگانہ جاگروتی کے کارکنوں نے ٹرافک سی آئی کو گھیر لیا

کوکٹ پلی وائی جنکشن میں آج اُس وقت کشیدگی پیدا ہوگئی جب تلنگانہ جاگروتی کی صدر کلواکنٹلا کویتا نے ڈاکٹر بی آر امبیڈکر کے مجسمے پر گلپوشی کرنے کے فوراً بعد جاگروتی کارکنوں اور ٹریفک پولیس کے درمیان پارکنگ کے مسئلے پر شدید بحث چھڑ گئی۔ اس واقعے نے علاقے میں کافی ہلچل مچا دی۔

عینی شاہدین کے مطابق، جاگروتی کارکنوں نے الزام لگایا کہ بالا نگر ٹریفک سی آئی نے ان سے ناشائستہ اور نامناسب زبان میں بات کی، جس کے باعث کارکن غصے میں آگئے۔ دیکھتے ہی دیکھتے بڑی تعداد میں کارکن جمع ہوگئے اور انہوں نے سی آئی کا پیچھا کرتے ہوئے گھیراؤ کرلیا، جس کے نتیجے میں جنکشن پر ٹریفک عارضی طور پر متاثر ہوا۔

بتایا جاتا ہے کہ پولیس نے جب کارکنوں کی گاڑیوں کی پارکنگ پر اعتراض کیا تو بحث شدت اختیار کرگئی۔ کارکنوں نے مطالبہ کیا کہ ٹریفک سی آئی اُن کے ساتھ پیش آئے طرزِ عمل پر وضاحت دیں۔ اضافی پولیس کو موقع پر پہنچ کر صورتِ حال کو کنٹرول کرنا پڑا۔

کوکٹ پلی جیسے مصروف علاقے میں اس اچانک پیش آنے والے ہنگامے سے مسافروں کو مشکلات کا سامنا کرنا پڑا، جب کہ جاگروتی کارکنوں کا کہنا تھا کہ وہ صرف عزت و احترام کے ساتھ برتاؤ چاہتے ہیں۔

Munsif News 24×7 کے مطابق، واقعے کے سلسلے میں پولیس کی جانب سے ابھی تک کوئی سرکاری بیان جاری نہیں کیا گیا ہے۔ تاہم کوکٹ پلی وائی جنکشن میں پیش آیا یہ واقعہ عوام میں بحث کا موضوع بنا ہوا ہے، اور مزید کارروائی کا انتظار ہے۔