بیٹے کو ٹکٹ نہ ملنے پر رکن اسمبلی ملکاجگری ہنمنت راؤ بی آر ایس سے مستعفی

حیدرآباد: حکمراں جماعت بی آر ایس کے رکن اسمبلی مانیم پلی ہنمنت راؤ نے جمعہ کے روز پارٹی سے استعفیٰ دے دیا۔ریاستی اسمبلی کے مجوزہ انتخابات میں حلقہ میدک سے فرزند کوٹکٹ نہ دیئے جانے پربطوراحتجاج راؤ نے بی آر ایس سے مستعفی ہونے کااعلان کیا۔

 ویڈیوپیام میں بھارت راشٹراسمیتی سے ترک تعلق کرنے کا اعلان کرتے ہوئے انہوں نے کہاکہ اس بات کا جلداعلان کریں گے کہ وہ کس جماعت میں شامل ہوں گے۔گریٹر حیدرآبادکے اسمبلی حلقہ ملکاجگری کے موجودہ رکن اسمبلی ایم ہنمنت راؤ کوبی آرایس نے اس حلقہ سے دوبارہ ٹکٹ دینے کافیصلہ کیاتھا ۔

تاہم رکن اسمبلی‘حلقہ اسمبلی میدک سے اپنے فرزند کو ٹکٹ دینے کامطالبہ کررہے تھے لیکن پارٹی قیادت نے میدک سے راؤ کے فرزند روہت راؤ کو ٹکٹ دینے سے انکارکردیا جس کے سبب وہ پارٹی کی قیادت سے شدید ناراض تھے۔

 انہوں نے دعویٰ کہاکہ ملکاجگری حلقہ کے عوام‘ان کے مداحوں اور تلنگانہ کے دورافتادہ علاقوں سے ان کے خیرخواہوں کی عین خواہش کے مطابق وہ بی آرایس سے مستعفی ہو چکے ہیں۔

انہوں نے حلقہ کے عوام کویقین دلایا کہ وہ ہمیشہ ان کے ساتھ کھڑے رہیں گے اور مرتے دم تک عوامی خدمات کرتے رہیں گے۔راؤ نے کہاکہ خودسپرد ہونے کا سوال ہی پیدا نہیں ہوگا۔بی آرایس کے صدروچیف منسٹر کے چندرشیکھرراؤ نے 21 اگست کوپارٹی کے جن 115 امیدواروں کی فہرست جاری کی تھی اس میں مانیم پلی ہنمنت راؤکا نام بھی شامل تھا۔

امیدواروں کی فہرست کی اجرائی سے چندگھنٹے قبل ہنمنت راؤنے پارٹی کے سرکردہ قائد وریاستی وزیر فینانس وصحت ٹی ہریش راؤکوشدید تنقید کانشانہ بنایا اور یہ الزام عائد کیا تھا کہ ہریش راؤ نے پارٹی کے کئی قائدین کاسیاسی کیرئیر تباہ کیاہے۔

ان سے اس کا جواب لینا ہوگا۔راؤ کے ان الزامات سے پارٹی قائدین سکتہ میں آگئے تھے۔ انہوں نے حلقہ میدک سے میرے فرزند روہت راؤ کوپارٹی ٹکٹ نہ دینے پر آزاد امیدوار کے طورپر الیکشن لڑنے کی بھی دھمکی دی تھی۔ حکمراں جماعت بی آرایس نے حلقہ میدک سے موجودہ ایم ایل اے پدما دیوریندر ریڈی کو ایک بارپھر امیدوار بنانے کا فیصلہ کیا ہے۔