آئی سی سی کوڈ آف کنڈکٹ کی خلاف ورزی پر معین علی کو جرمانہ

برمنگھم: انگلینڈ کے آل راؤنڈر معین علی پر آسٹریلیا کے خلاف پہلے ٹیسٹ کے دوران آئی سی سی کے ضابطہ اخلاق کی خلاف ورزی کرنے پر ان کی میچ فیس کا 25 فیصد جرمانہ عائد کیا گیا ہے۔ انٹرنیشنل کرکٹ کونسل (آئی سی سی) نے اتوار کو یہ اطلاع دی۔

معین علی نے آئی سی سی کوڈ آف کنڈکٹ برائے پلیئرز اور پلیئر سپورٹ پرسنل کے آرٹیکل 2.20 کی خلاف ورزی کی ہے۔ یہ کوڈ کھیل کی روح کے خلاف طرز عمل ظاہر کرنے سے متعلق ہے۔

آئی سی سی کوڈ آف کنڈکٹ کی سطح 1 کی خلاف ورزی پر معین کے تادیبی ریکارڈ میں ایک ڈیمیرٹ پوائنٹ شامل کیا گیا ہے۔ انگلینڈ کے آل راؤنڈر کا 24 ماہ میں یہ پہلا جرم تھا۔

یہ واقعہ ایجبسٹن میں آسٹریلیا کی پہلی اننگز کے 89ویں اوور کے دوران پیش آیا جب معین باؤنڈری کے نزدیک فیلڈنگ کرتے ہوئے اپنی انگلی پر مرہم لگاتے ہوئے نظر آئے۔ معین نے اعتراف جرم کیا اور میچ ریفری اینڈی پائکرافٹ کی تجویز کردہ سزا کو قبول کیا۔

آئی سی سی کی ایک ریلیز کے مطابق پائی کرافٹ اس بات سے مطمئن تھے کہ معین نے کریم صرف اپنے ہاتھ کو خشک کرنے کے لیے لگائی تھی۔ یہ کریم گیند پر ملنے کے نہیں لگائی گئی تھی، اس لیے معین پر آئی سی سی کوڈ آف کنڈکٹ کے آرٹیکل 41.3 (غیر منصفانہ کھیل، گیند کے ساتھ چھیڑ چھاڑ) کی خلاف ورزی کا الزام نہیں لگایا گیا۔

آن فیلڈ امپائرز احسن رضا اور ماریس ایراسمس، تھرڈ امپائر کرس گیفنی اور چوتھے امپائر مائیک برنز نے معین پر الزام عائد کیا۔ لیول 1 کی خلاف ورزی پر کم از کم آفیشل سرزنش، کھلاڑی کی میچ فیس کا زیادہ سے زیادہ 50 فیصد جرمانہ اور ایک یا دو ڈیمیرٹ پوائنٹس شامل کرنے کا التزام ہے۔