مونو مانیسر 4 دن کی ہریانہ پولیس ریمانڈ پر

گروگرام: راجستھان کی اجمیر جیل سے ہریانہ کے گروگرام لائے گئے مونو مانیسر کو پٹودی کی عدالت نے ہفتہ کو چار دن کے ٹرانزٹ ریمانڈ پر بھیج دیا۔

اس سے پہلے ہریانہ پولیس نے آج ہی مونو کو راجستھان سے لے کر آئی اوراسے پٹودی کی عدالت میں سخت سیکورٹی میں پیش کیا۔ عدالت نے استغاثہ اور دفاع کے دلائل سننے کے بعد مونو کو چار روزہ ریمانڈ پر پولیس کے حوالے کرنے کا حکم دیا۔

 ہریانہ پولیس کو مونو گزشتہ فروری میں پٹودی میں درج قتل کی کوشش کے معاملے کے علاوہ گینگسٹر لارنس سے ویڈیو کال پر ہونے والی اس کی گفتگو کو لے کر مطلوب ہے۔ پولیس اب مونو سے پوچھ گچھ کرے گی۔

قابل ذکر ہے کہ ناصر- جنید قتل کیس میں مونو مانیسر راجستھان کی اجمیر جیل میں بند تھا اور اس کے ایک دیگر معاملے میں نامزد ہونے کی وجہ سے ہریانہ پولیس اسے آج ہی وہاں سے لے کر آئی تھی۔

اس کی یہ پیشی گروگرام کے پٹودی علاقے میں 7 فروری کو ہوئی فائرنگ سے متعلق درج مقدمے میں ہوئی۔ مونو کے خلاف اس معاملے میں تعزیرات ہند کی دفعہ 307 کے تحت مقدمہ درج کیا گیا ہے۔