اخلاقی محاسن آزادی کے ضامن: جماعت اسلامی ہند تلنگانہ شعبہ خواتین کے زیر اہتمام بین المذاہب سمینار

حیدرآباد: جماعت اسلامی ہند تلنگانہ شعبہ خواتین کے زیر اہتمام مدینہ ایجوکیشن سنٹر، نامپلی میں "اخلاقیات ہی آزادی ہے” کے عنوان پر ایک بین المذاہب سمینار کا انعقاد کیا گیا۔ اس سمینار میں مختلف مذاہب کی نمائندہ خواتین، بشمول ہندو، جین، کرسچن، اور سکھ برادریوں کی بہنوں نے شرکت کی۔

اس موقع پر شعبہ خواتین جماعت اسلامی ہند تلنگانہ کی سکریٹری محترمہ خدیجہ مہوین نے اپنے صدارتی خطاب میں کہا کہ اسلام نے نہ صرف آزادی بلکہ اخلاقیات کو بھی بہت اہمیت دی ہے اور آج کے معاشرے میں اخلاقیات کو عام کرنے کی اشد ضرورت ہے۔

محترمہ کے این چندریکا دیوی، بانی اور چیئرمین کنیار وا ویلفیئر سوسائٹی نے والدین کے حقوق پر روشنی ڈالی، جبکہ محترمہ پربھا ملاواراپو، پرنسپل سینٹ فرانسس جونیئر کالج نے بچوں کے حقوق پر گفتگو کی۔ راما کرن، کلوری اور آرادھنا ٹی وی اسپیکر نے اس بات پر زور دیا کہ اصول و اخلاقیات کے بغیر ہم اپنے حقوق سے محروم ہو جائیں گے۔

محترمہ ریتا سورانا، جین ویمن ونگ کی ڈائریکٹر نے اخلاق و کردار کی اہمیت پر بات کی، جبکہ ڈاکٹر بھوپندر کور، سکول سکھر کی کارکن نے سب کے لیے اچھی سوچ رکھنے کی تلقین کی۔

اس پروگرام کا مقصد ملک میں فرقہ وارانہ ہم آہنگی کو فروغ دینا، اسلام اور مسلمانوں کے بارے میں غلط فہمیوں کو دور کرنا، اور اخلاق و کردار کی اہمیت کو اجاگر کرنا تھا۔ سمینار کے کنوینر کے فرائض ڈاکٹر اسری محسنہ نے انجام دیے، جبکہ محترمہ زوحہ میامین، اسسٹنٹ سیکرٹری حلقہ تلنگانہ نے شکریہ ادا کیا۔ پروگرام میں شریک خواتین نے اس اقدام کو بے حد سراہا۔