مساجد کی رونق باجماعت نماز سے، ایمان کی حفاظت اسی میں ہے: مفتی صابر پاشاہ

حیدرآباد: لینگویجز ڈویلپمنٹ آرگنائزیشن کے چیئرمین اور مسجد تلنگانہ اسٹیٹ حج ہاؤس، نامپلی کے خطیب و امام، مولانا مفتی ڈاکٹر حافظ محمد صابر پاشاہ قادری نے باجماعت نماز کی فضیلت اور اجتماعی برکتوں پر زور دیتے ہوئے کہا کہ اسلام میں جماعت کی بڑی اہمیت ہے اور باجماعت نماز ترک کرنا ایمان و عمل دونوں کے لیے نقصان دہ ہے۔

مولانا صابر پاشاہ قادری نے اپنے خطاب میں کہا کہ باجماعت نماز صرف عبادت نہیں بلکہ اتحاد امت، باہمی محبت، اُخوّت اور نظم و ضبط کا عظیم نشان ہے۔ انہوں نے کہا کہ نماز کی جماعت سے روحانی برکتیں نازل ہوتی ہیں اور اللہ تعالیٰ کی خاص رحمت ایسے لوگوں پر سایہ فگن ہوتی ہے جو باہم مل کر اللہ کے حضور کھڑے ہوتے ہیں۔ حضور نبی اکرم صلی اللہ علیہ وآلہ وسلم نے فرمایا کہ جماعت میں پڑھی جانے والی نماز، انفرادی نماز سے ستائیس درجے زیادہ افضل ہے۔

انہوں نے مزید کہا کہ باجماعت نماز مسلمانوں کے درمیان مساوات اور بھائی چارے کا عملی درس دیتی ہے، کیونکہ صف میں کھڑا ہر شخص، چاہے کسی بھی طبقہ سے ہو، اللہ کے سامنے برابر ہے۔ یہی اجتماعی روح ہے جسے مضبوط رکھنے کے لیے جماعت کی پابندی لازم ہے۔

مولانا مفتی صابر پاشاہ قادری نے والدین، اساتذہ اور دینی رہنماؤں سے اپیل کی کہ نوجوانوں اور بچوں میں جماعت کا شوق پیدا کریں اور مساجد کو عبادت کا مرکز بنانے کی کوشش کریں۔ انہوں نے کہا، "مساجد کی رونق باجماعت نماز سے ہے اور نماز کی روح جماعت سے مکمل ہوتی ہے۔”

انہوں نے باجماعت نماز چھوڑنے والوں کو بھی خبردار کیا اور احادیثِ مبارکہ کی روشنی میں کہا کہ اس عمل پر سخت وعیدیں آئی ہیں۔ نبی کریم صلی اللہ علیہ وآلہ وسلم نے فرمایا کہ جن لوگوں کو اذان سن کر بھی مسجد کی جماعت میں حاضر نہیں ہوتے، ان کے گھروں کو آگ لگانے کا ارادہ فرمایا گیا۔ مولانا نے کہا کہ اگر انسان صحت مند ہے، چل پھر سکتا ہے، دیکھ سکتا ہے، کھا پی سکتا ہے اور دنیاوی کام انجام دے سکتا ہے مگر مسجد کی طرف قدم نہیں بڑھاتا، تو یہ اللہ کے نزدیک ایک سنگین غفلت ہے۔

مولانا نے مزید فرمایا کہ نبی کریم صلی اللہ علیہ وآلہ وسلم نے فرمایا کہ منافقین پر سب سے بھاری نمازیں فجر اور عشاء کی ہیں کیونکہ انہی نمازوں میں ان کی کمزوری ظاہر ہوتی ہے۔ جو شخص مسجد تک چلنے کی طاقت رکھتا ہو مگر باجماعت نماز ترک کرے، وہ اپنے ایمان اور اعمال پر نظرِ ثانی کرے، کیونکہ دنیا کی آرام و راحت آخرت کے خسارے سے نجات نہیں دلا سکتی۔

خطاب کے آخر میں مولانا مفتی ڈاکٹر حافظ محمد صابر پاشاہ قادری نے زور دے کر کہا:
"جماعت میں خیر ہے، اتحاد ہے، حفاظت ہے، اور اللہ تعالیٰ کی خاص نصرت ہے۔ آئیے، ہم سب مساجد کو آباد رکھیں اور باجماعت نماز کی پابندی کرکے اللہ کی رضا و رحمت کے مستحق بنیں۔”