نامپلی نمائش ایک دن کے لیے ملتوی، فائر حادثہ کے باعث عوام سے تعاون کی اپیل: وی سی سجنار

حیدرآباد : نامپلی میں پیش آئے شدید آتشزدگی کے واقعہ کے پیشِ نظر حیدرآباد پولیس کمشنر وی سی سجنار، آئی پی ایس نے عوام سے اپیل کی ہے کہ وہ نامپلی نمائش (Nampally Numaish) کے دورے کو ایک دن کے لیے ملتوی کر دیں۔ انہوں نے کہا کہ فرنیچر کی دکان میں لگنے والی آگ کے باعث حادثہ کے مقام کے اطراف ٹریفک شدید متاثر ہوا ہے، جس کے سبب شہریوں کو مشکلات کا سامنا کرنا پڑ سکتا ہے۔

پولیس کمشنر نے کہا کہ ٹریفک کی روانی اور عوام کی سلامتی کو مدنظر رکھتے ہوئے زائرین سے گزارش ہے کہ وہ اپنی نمائش کی سیر اتوار (کل) تک مؤخر کریں اور انتظامیہ کے ساتھ تعاون کریں۔

ادھر نامپلی میں واقع بچا کرسٹل فرنیچر اسٹور میں ایک خوفناک آتشزدگی کا واقعہ پیش آیا، جس میں چار منزلہ عمارت آگ کی لپیٹ میں آ گئی۔ ابتدائی اطلاعات کے مطابق عمارت میں دو کمسن بچوں سمیت چھ افراد کے پھنسے ہونے کی خبر ہے۔

واقعہ کی اطلاع ملتے ہی فائر بریگیڈ کی متعدد گاڑیاں موقع پر پہنچ گئیں اور بڑے پیمانے پر ریسکیو آپریشن شروع کیا گیا۔ حکام کے مطابق آگ لگنے کی ممکنہ وجہ شارٹ سرکٹ ہو سکتی ہے، تاہم حتمی تصدیق جانچ کے بعد ہی سامنے آئے گی۔

گراؤنڈ فلور سے اٹھنے والے گھنے دھوئیں کے باعث عمارت میں موجود افراد باہر نکلنے سے قاصر رہے اور وہ بالائی منزلوں میں پھنس کر رہ گئے۔ ریسکیو ٹیمیں جے سی بی مشینوں اور بھاری کرینوں کی مدد سے عمارت کے اوپری حصوں میں موجود افراد کو بحفاظت باہر نکالنے کے لیے مسلسل کوششیں کر رہی ہیں۔

فائر اور پولیس حکام موقع پر موجود ہیں اور حالات پر گہری نظر رکھی جا رہی ہے۔ ریسکیو آپریشن تاحال جاری ہے، جبکہ مزید تفصیلات کا انتظار کیا جا رہا ہے۔