یومِ اقلیتی حقوق پر ویمنس یونیورسٹی میں قومی سمینار، تنوع، مساوات اور اتحاد پر زور

یومِ اقلیتی حقوق کے موقع پر ویراناری چاکلی ایلّما ویمنز یونیورسٹی (وی سی آئی ڈبلیو یو) میں ایک روزہ قومی سمینار کا کامیابی سے انعقاد عمل میں آیا۔ اس سمینار کا موضوع ”انڈیا ٹوگیدر: تنوع کا جشن، مساوات کی ضمانت، اور اتحاد کی تعمیر“ رکھا گیا تھا۔ پروگرام کا اہتمام یونیورسٹی کے مائناریٹی سیل نے ایس سی/ایس ٹی سیل، بی سی سیل اور ویمنز اسٹڈی سینٹر کے اشتراک سے کیا۔

افتتاحی اجلاس میں سینئر آزاد صحافی اور مورخ ڈاکٹر انعام الرحمٰن (غیور) اور عثمانیہ یونیورسٹی کی اسوسی ایٹ پروفیسر و سابق ڈائریکٹر مائناریٹی سیل ڈاکٹر سیدہ عظیم النساء نے بطور مہمانانِ خصوصی شرکت کی۔ اس موقع پر وائس چانسلر سینئر پروفیسر سوریا دھننجے بطور مہمانِ خصوصی شریک ہوئیں، جن کی متاثر کن موجودگی اور خطاب نے پروگرام کو خصوصی اہمیت دی۔ انہوں نے اپنے ذاتی تعلیمی سفر کا حوالہ دیتے ہوئے اس بات پر زور دیا کہ تعلیم کس طرح زندگیوں میں مثبت تبدیلی لا سکتی ہے اور ادارہ جاتی مساوات کو فروغ دے سکتی ہے۔

یہ سمینار ڈاکٹر سیدہ آمنہ کوثر، پروگرام کنوینر اور ڈائریکٹر (انچارج) مائناریٹی سیل کی قیادت میں منعقد کیا گیا۔ سمینار کا بنیادی مقصد علمی مکالمے، فکری تبادلہ اور طلبہ کی فعال شرکت کے ذریعے آئینی اقدار، تنوع، مساوات اور اتحاد کو مضبوط کرنا تھا۔

اجلاس سے خطاب کرتے ہوئے ڈاکٹر انعام الرحمٰن (غیور) نے “قوم کی تعمیر میں اقلیتوں کا کردار” کے موضوع پر روشنی ڈالی اور جامع تاریخی بیانیے اور ذمہ دار صحافت کی اہمیت کو اجاگر کیا۔ ڈاکٹر سیدہ عظیم النساء نے “ہندوستان میں اقلیتوں کے بااختیار بنانے کے راستے” کے عنوان سے لیکچر دیا، جس میں سماجی انصاف، خواتین کے اختیارات اور پائیدار ترقی پر تفصیل سے گفتگو کی گئی۔

سمینار میں طلبہ کی بھرپور شرکت دیکھنے میں آئی۔ اس موقع پر نعرہ نویسی، مضمون نویسی، ای-پوسٹر ڈیزائننگ اور پوسٹر میکنگ جیسے مختلف مقابلے منعقد کیے گئے، جن میں طلبہ کو ہندی، انگریزی، تلگو اور اردو زبانوں میں اپنی تخلیقی صلاحیتوں کے اظہار کا موقع دیا گیا۔

اختتامی اجلاس میں انسپکٹر سنیتا سروے، لیڈرشی ٹیمز، ساؤتھ ویسٹ زون، حیدرآباد نے خصوصی شرکت کی اور خواتین کی سلامتی، بین الثقافتی ہم آہنگی اور سماجی ذمہ داری جیسے اہم موضوعات پر خطاب کیا۔ سمینار کا اختتام جامع تعلیم اور آئینی اقدار کے فروغ کے لیے وی سی آئی ڈبلیو یو کے مضبوط عزم کی تجدید کے ساتھ ہوا، جبکہ مختلف زمروں میں کامیاب طلبہ کو انعامات اور تمام شرکاء کو اسناد بھی تقسیم کی گئیں۔