سرکاری ملازمتوں کے امتحانات مناسب طورپر منعقد نہ کرنے والوں کو بے دخل کرنے کی ضرورت:ریونت ریڈی

حیدرآباد: تلنگانہ کانگریس کے صدرریونت ریڈی نے پبلک سرویس کمیشن کے مسابقتی امتحان کے باربارالتوا پر ضلع ورنگل سے تعلق رکھنے والی پراولیکانامی طالبہ کی شہرحیدرآباد کے ایک ہاسٹل میں خودکشی کے واقعہ پر ردعمل ظاہر کرتے ہوئے کہا کہ بے روزگاروں کی خودکشی تکلیف دہ ہے۔

انہوں نے کہاکہ ان حکمرانوں کو بے دخل کرنے کی ضرورت ہے جو سرکاری ملازمتوں کے امتحانات مناسب طورپر منعقد نہیں کر پا رہے ہیں۔ بیروزگاری الاؤنس کا جھوٹا وعدہ کرنے والوں کو آئندہ انتخابات میں سبق سکھانے کی ضرورت ہے۔

ریونت نے ٹویٹ کیا کہ حکومت کو طالبہ کی خودکشی پر فوری کارروائی کرنی چاہئے۔انہوں نے کہا کہ بے روزگار طالبہ نے خودکشی کی کیونکہ وہ مسابقتی امتحانات کے پرچوں کے باربار لیک ہونے کے سبب مایوس تھی۔

اسی دوران تلنگانہ جناسمیتی کے سربراہ پروفیسر کودنڈارام نے اس واقعہ پر ردعمل ظاہر کرتے ہوئے کہا کہ ریاست میں بے روزگار نوجوان حکومت کے ہٹ دھرمی کے رویہ کی وجہ سے خودکشی کر رہے ہیں۔

ملازمتیں نہ ملنے کی وجہ سے اب تک 200 طلباء کی موت ہو چکی ہے۔ انہوں نے کہا کہ اگر ملازمتیں دی جاتی تو ایسے مسائل پیدا نہ ہوتے۔ اب بھی حکومت کو چاہئے کہ وہ ہٹ دھرمی سے گریز کرے۔