متحدہ عرب امارات میں کمپنیوں پر نئی پابندی

ابوظبی: متحدہ عرب امارات (یو اے ای) میں اماراتی وزارت افرادی قوت کی جانب سے اماراتی شہریوں کو روزگار فراہم کرنے کے کابینہ کے فیصلہ کے دوسرے مرحلہ پرعمل در آمد کا آغاز کردیا گیا ہے۔

غیر ملکی ذرائع ابلاغ کے مطابق دوسرے مرحلہ میں ایسی کمپنیاں اور ادارے جہاں کارکنوں کی تعداد 20 سے 49 ہے وہاں رواں برس 2024 کے دوران کم از کم ایک اماراتی شہری کو روزگار فراہم کرنے کی پابندی عائد کی گئی ہے۔

وزارت افرادی قوت کے مطابق ایسی کمپنیاں اور ادارے جہاں کارکن 20 سے زیادہ اور 49 سے کم ہیں‘ان کی مجموعی تعداد 12 ہزار کے قریب ہے جو 14 شعبوں میں کام کررہی ہیں۔

فیصلہ کے مطابق آئندہ برس 2025 میں ایک اور اماراتی شہری کو روزگار فراہم کرنا ضروری ہوگا جس کا مقصد بے روزگاری پرقابو پانا اور زیادہ سے زیادہ اماراتی شہریوں کو روزگارکے مواقع فراہم کرنا ہے۔

وزارت کے مطابق رئیل اسٹیٹ‘ فنی‘ ٹیلی کمیونیکیشن‘ انشورنس‘ علمی اور اسی قسم کے دیگر شعبے ایجوکیشن سیکٹر‘ صحت اور سوشل ورک کے علاوہ تفریح‘ ہول سیل اور ریٹیل کاروبار‘ لاجسٹک اور اسٹوریج اور دیگر شعبے شامل ہیں۔

وزارت افرادی قوت نے کہا ہے کہ قانون کے مطابق جن شعبوں کا ذکر کیا گیا ہے ان کے ذمہ داروں کو چاہئے کہ وہ جلد از جلد قانون پر عمل درآمد کریں تاکہ کسی قسم کی پریشانی نہ اٹھانی پڑے۔