اسمگلنگ کا نیا طریقہ، کھجور میں چھپاکر لایاگیا سونا کسٹمز حکام نے پکڑلیا (ویڈیو وائرل)

حیدرآباد: اسمگلروں نے سونا چھپانے کیلئے ایک نیا طریقہ اپنا لیا، لیکن ایئرپورٹ پر تعینات کسٹمز حکام نے ان کی چالاکی پکڑ لی۔ حال ہی میں کھجوروں کی تھیلی میں سونے کے ٹکڑے چھپا کر اسمگلنگ کرنے کی کوشش کی گئی، جسے حکام نے ناکام بنا دیا۔

تفصیلات کے مطابق، ایئرپورٹ پر تعینات کسٹمز افسران نے جب مشتبہ سامان کو کھولا اور تفتیش کی، تو انہیں حیران کن انکشاف ہوا۔ کھجور کے پھلوں کے اندر سونے کے ٹکڑے انتہائی مہارت سے چھپائے گئے تھے، یہاں تک کہ ایک سونے کی چین بھی ایک کھجور کے بیگ میں موجود تھی۔

حکام کے مطابق، برآمد شدہ سونے کا وزن 172 گرام تھا، جو اسمگلنگ کے لیے چھپا کر لایا گیا تھا۔ فی الحال حکام اس معاملے کی مزید تحقیقات کر رہے ہیں اور اسمگلنگ نیٹ ورک کا پتہ لگانے میں مصروف ہیں۔ یہ حیران کن واقعہ سوشل میڈیا پر بھی وائرل ہو گیا، جہاں لوگ اسمگلروں کے انوکھے طریقے پر حیرت کا اظہار کر رہے ہیں۔