سڑک کنارے مردہ کتے کا گوشت کھاتا شخص، ویڈیو وائرل

سمبل پور۔ اوڈیشہ کے ضلع سمبل پور میں ایک افسوسناک واقعہ پیش آیا، جہاں ایک شخص سڑک حادثہ میں ہلاک ہونے والے کتے کا گوشت کھاتا ہوا نظر آیا۔ اس واقعہ کی ویڈیو سوشل میڈیا پر تیزی سے وائرل ہورہی ہے۔

مقامی لوگوں کے مطابق منیشور چھک کے قریب ایک کتا گاڑی کی زد میں آکر ہلاک ہوگیا تھا۔ اس کی لاش سڑک کے کنارے پڑی ہوئی تھی۔ اسی دوران لوگوں نے ایک شخص کو کتے کی لاش کے قریب بیٹھ کر اس کا گوشت کھاتے ہوئے دیکھا۔

موقع پر موجود افراد نے اس شخص کی حالت اور غیر معمولی رویہ کو دیکھتے ہوئے شبہ ظاہر کیا کہ وہ ذہنی پریشانی کا شکار ہوسکتا ہے اور انتہائی خراب حالات میں زندگی گزار رہا ہے۔ لوگوں نے اسے روکنے کی کوشش بھی کی، لیکن ابتدائی طور پر اس نے ان کی باتوں پر کوئی توجہ نہیں دی۔

اس واقعہ کی ویڈیو وائرل ہونے کے بعد سوشل میڈیا پر بھوک، بے گھری اور ذہنی صحت جیسے مسائل پر بحث شروع ہوگئی ہے۔ مقامی لوگوں نے انتظامیہ سے مطالبہ کیا ہے کہ اس شخص کی شناخت کرتے ہوئے اسے فوری طور پر کھانا، محفوظ رہائش اور ضروری طبی و ذہنی صحت کی سہولتیں فراہم کی جائیں۔