بی جے پی کے ساتھ پی ڈی پی کا اتحاد خارج ازبحث : محبوبہ مفتی

سری نگر: پی ڈی پی صدر محبوبہ مفتی نے منگل کے دن جموں وکشمیر میں بی جے پی سے کسی بھی اتحاد کو خارج ازبحث قراردیا۔ انہوں نے زور دے کر کہا کہ اسمبلی الیکشن کے بعد حکومت کی تشکیل ان کی پارٹی کی شمولیت کے بغیر ممکن نہیں۔

نیشنل کانفرنس کو نشانہ تنقید بناتے ہوئے انہوں نے کہا کہ وہ صرف حکومت بنانے کے لئے الیکشن لڑرہی ہے۔ سری نگر میں پارٹی ہیڈکوارٹرس میں ورکرس سے خطاب میں محبوبہ مفتی نے کہا کہ نیشنل کانفرنس 1947 سے یہی کررہی ہے۔ اس کا کوئی اور مقصد نہیں۔ وہ صرف حکومت سازی اور وزارتوں کے لئے اتحاد کرتی ہے۔

پی ڈی پی سربراہ نے کہا کہ ان کی پارٹی ایک ایجنڈہ کے لئے الیکشن لڑنا چاہتی ہے۔ انہوں نے زور دے کر کہا کہ اسمبلی الیکشن کے بعد حکومت کی تشکیل ان کی پارٹی کو ساتھ لئے بغیر ممکن نہیں۔ انہوں نے کہا کہ ہم نے 2002 میں صرف 16 ارکان ِ اسمبلی کے ساتھ حکومت بنائی تھی۔

انشاء اللہ اس بار بھی پی ڈی پی کی شمولیت کے بغیر حکومت نہیں بنے گی۔ انہوں نے کہا کہ پی ڈی پی کی توجہ حکومت سازی سے زیادہ اپنا ایجنڈہ لاگو کرنے پر مرکوز ہے۔

2015 میں بی جے پی کے ساتھ مل کر حکومت بنانے والی پی ڈی پی کی سربراہ نے الیکشن کے بعد بھگوا جماعت سے اتحاد سے انکار کردیا۔ انہوں نے کہا کہ ہماری پارٹی نے مسئلہ کشمیر حل کرنے کے لئے بی جے پی سے ہاتھ ملایا تھا۔