حیدرآباد میں بارش، ٹریفک مسائل سے بچنے عوام نے میٹرو کو ترجیح دی

حیدرآباد: شہرحیدرآباد میں بارش کے دوران ٹریفک کے مسائل سے بچنے کیلئے عوام کی بڑی تعداد نے میٹرو ریل کو سفر کیلئے ترجیح دی۔

ان میں دفاتر کو جانے والوں کی بڑی تعداد شامل ہے۔ان مسافرین نے کہاکہ شدیدبارش کے نتیجہ میں پانی کی نکاسی کے لئے مناسب انتظام نہ ہونے اور ڈرینس کے بھی کھلے ہونے سے کئی مسائل سامنے آرہے ہیں، ان مسائل سے بچنے کیلئے وہ میٹرو کو ترجیح دے رہے ہیں۔

مسافرین نے کہاکہ عام ٹریفک کی بہ نسبت میٹرو کا سفر ان کے لئے انتہائی آسان بھی ہے کیونکہ شدید بارش کے بعد ٹریفک کے کئی مسائل سامنے آرہے ہیں۔

بعض مسافرین نے کہاکہ سڑک کے راستے سفر پر ان کو تقریبا ایک گھنٹہ درکارہوتا ہے جبکہ میٹرو کے ذریعہ وہ 15منٹ تک اپنی منزل پر پہنچ رہے ہیں۔

ان مسافرین نے کہاکہ ہر دوتاتین منٹ میں ایک میٹرو ٹرین آرہی ہے جس میں سفر ان کے لئے مشکل نہیں ہے۔

ان مسافرین نے دیگر ٹرانسپورٹ کے مقابلہ ان دنوں میٹرو کو محفوظ اور سستاٹرانسپورٹ کا ذریعہ قراردیا اورکہا کہ بارش کے دوران ٹیکسی بک کرنا ان کے لئے دشوار بن گیا ہے۔