حیدرآباد میں ‘یوا بھارت رن 2026’ میں عوام کا جمِ غفیر، گورنر نے نظم و ضبط پر زور دیا
اس موقع پر تلنگانہ کے گورنر شیو پرتاپ شکلا، سابق نائب صدر ایم وینکیا نائیڈو، مرکزی وزیر جی کشن ریڈی، ریاستی آئی ٹی وزیر ڈی شری دھر بابو، بی جے پی کے ریاستی صدر سمیت کئی معزز شخصیات شریک ہوئیں۔
حیدرآباد: تلنگانہ کے گورنر شیو پرتاپ شکلا نے نوجوانوں سے اپیل کی ہے کہ وہ نشے سے دور رہ کر خود کفیل ہندوستان کی تعمیر میں اپنا کردار ادا کریں۔ انہوں نے جسمانی فٹنس کے ساتھ ساتھ دھیان (میڈیٹیشن) کی اہمیت پر بھی زور دیا۔
وہ یہاں ’یوا بھارت رن 2026‘ پروگرام میں شریک عوام کو خطاب کر رہے تھے۔ نیکلس روڈ پر منعقدہ اس پروگرام میں 10,000 سے زیادہ شرکاء نے حصہ لے کر فٹنس، اتحاد اور صحت مند طرزِ زندگی کا پیغام دیا۔
یہ پروگرام نجی شعبے اور وزارتِ نوجوان امور و کھیل کے تعاون سے صبح چھ بجے شروع ہوا، جس میں شرکاء نے مختلف زمروں میں حصہ لیا۔
اس موقع پر تلنگانہ کے گورنر شیو پرتاپ شکلا، سابق نائب صدر ایم وینکیا نائیڈو، مرکزی وزیر جی کشن ریڈی، ریاستی آئی ٹی وزیر ڈی شری دھر بابو، بی جے پی کے ریاستی صدر سمیت کئی معزز شخصیات شریک ہوئیں۔
فلمی اداکار شروانند، ایم ایل سی مالکا کوموریا اور دیگر مہمانوں نے دوڑ کو ہری جھنڈی دکھائی اور نوجوانوں کو صحت مند و فعال طرزِ زندگی اپنانے کی ترغیب دی۔
سابق نائب صدر ایم وینکیا نائیڈو نے قوم کی تعمیر میں نوجوانوں اور تعلیم کے کردار پر گفتگو کرتے ہوئے نوجوانوں کو اپنی ثقافت سے جڑے رہنے، مادری زبان بولنے، والدین اور اساتذہ کا احترام کرنے اور نظم و ضبط قائم رکھنے کی نصیحت کی۔
انہوں نے صحت مند زندگی کے لیے باقاعدہ ورزش، جلدی اٹھنے اور گھریلو کھانے پر زور دیا اور سوشل میڈیا کے حد سے زیادہ استعمال سے بچنے کی ہدایت دی۔
