مہاکمبھ میں ’شاہی اسنان‘ کا نام بدلنے کی تیاری، ’شاہی‘ لفظ منظور نہیں

لکھنؤ: اتر پردیش کے پریاگ راج میں 13 جنوری 2025 سے ہونے والے مہاکمبھ کی تیاریاں زور و شور سے جاری ہیں۔ اس دوران ایک نئی پیش رفت سامنے آئی ہے کہ مہاکمبھ میں اکھاڑوں کے ‘شاہی اسنان’ کا نام بدلنے کی تیاری کی جارہی ہے۔ کچھ سَنتوں نے اس بات کی تجویز دی ہے کہ ‘شاہی’ لفظ کی جگہ ‘راجسی’ لفظ استعمال کیا جائے۔

مدھیہ پردیش میں مہاکال کی ‘شاہی سواری’ سے ‘شاہی’ لفظ ہٹانے کے بعد یہ مطالبہ اب اُٹھ رہا ہے۔ مدھیہ پردیش کے وزیر اعلیٰ موہن یادو نے ‘شاہی سواری’ کو ‘راجسی سواری’ میں تبدیل کرنے کا فیصلہ کیا ہے جسے سَنتوں نے سراہا ہے۔

اس کے بعد، اکھل بھارتیہ اکھاڑا پریشد کے سربراہ شری منسا دیوی مندر ٹرسٹ کے چیف اور شری نرنجنی پنچایتی اکھاڑا کے سکریٹری شری مہنت رویندرپوری نے بھی کمبھ کے ‘شاہی اسنان’ سے ‘شاہی’ لفظ ہٹانے کی کوشش شروع کر دی ہے۔

مہنت رویندرپوری کا کہنا ہے کہ ‘شاہی’ لفظ مغل دور سے منسلک ہے اور اردو زبان کا ہے، جو کہ ہندوستانی ثقافت کے مطابق نہیں ہے۔ ان کے مطابق، ‘راجسی’ لفظ ہندی ثقافت کے زیادہ قریب ہے اور اس کا استعمال ‘شاہی اسنان’ کے بجائے ہونا چاہئے۔

سَنتوں کی میٹنگ میں اس تجویز پر بحث ہوگی اور اس سلسلے میں ایک قرارداد لائی جائے گی۔ اس قرارداد کے بعد، سَنت ہریدوار، اجین، اور پریاگ راج میں اس معاملے پر مزید کارروائی کریں گے۔

واضح رہے کہ مدھیہ پردیش کے وزیر اعلیٰ کے فیصلے کے بعد، جس میں ‘شاہی سواری’ کو ‘راجسی سواری’ میں تبدیل کیا گیا تھا، سَنتوں نے اس فیصلے کی حمایت کی ہے اور اب کمبھ کے ‘شاہی اسنان’ کا نام بھی ‘راجسی اسنان’ کرنے کی تیاری کی جارہی ہے۔