تلنگانہ میں بلدیاتی انتخابات کی تیاریوں میں تیزی، میونسپل ریزرویشن حتمی

تلنگانہ میں مجوزہ بلدیاتی انتخابات کے پیش نظر ریاستی حکومت نے میونسپل وارڈز، چیئرپرسنز اور میئر کے عہدوں کے لیے ریزرویشن کو حتمی شکل دے دی ہے۔ اس پیشرفت کے ساتھ ہی شہری بلدیاتی اداروں کے انتخابات کی تیاریوں میں تیزی آ گئی ہے۔

ذرائع کے مطابق بلدیاتی انتخابات کا اعلان فروری کے پہلے ہفتے میں متوقع ہے، جبکہ اس سلسلے میں باقاعدہ نوٹیفکیشن آئندہ دو ہفتوں کے اندر جاری کیا جا سکتا ہے۔ میونسپل ایڈمنسٹریشن کی سکریٹری ٹی کے سری دیوی نے گزشتہ دو دنوں کے دوران ریزرویشن سے متعلق احکامات جاری کیے ہیں۔

ریزر ویشن کا تعین درج ذیل بنیادوں پر کیا گیا ہے:
ایس سی اور ایس ٹی طبقات کے لیے 2011 کی مردم شماری،
پسماندہ طبقات کے لیے بیک ورڈ کلاسس ڈیڈیکیٹڈ کمیشن کی رپورٹ،
اور خواتین کے لیے تلنگانہ اسٹیٹ میونسپلٹیز ایکٹ 2019 کے تحت 50 فیصد ریزرویشن۔

ریاست بھر میں اب تک 121 میونسپلٹیز اور 10 میونسپل کارپوریشنوں کے لیے ریزرویشن طے کر دی گئی ہے۔ سرکاری ذرائع کا کہنا ہے کہ تلنگانہ اسٹیٹ الیکشن کمیشن جلد ہی 117 میونسپلٹیز اور چھ میونسپل کارپوریشنوں کے لیے انتخابی شیڈول جاری کرنے کی تیاری میں ہے۔ تاہم، چند دیگر شہری بلدیاتی اداروں کے انتخابات قانونی اور انتظامی پیچیدگیوں کے باعث تاحال التوا کا شکار ہیں۔

ادھر اسٹیٹ الیکشن کمیشن نے حتمی ووٹر لسٹ بھی جاری کر دی ہے۔ تلنگانہ کے شہری علاقوں میں رجسٹرڈ ووٹروں کی مجموعی تعداد 52.43 لاکھ تک پہنچ چکی ہے، جن میں 25.62 لاکھ مرد، 26.8 لاکھ خواتین اور 640 تیسری جنس سے تعلق رکھنے والے ووٹر شامل ہیں۔

ریزرویشن کے عمل کی تکمیل اور ووٹر لسٹ کے حتمی ہونے کے بعد اب بلدیاتی انتخابات کے لیے میدان پوری طرح تیار ہو چکا ہے۔ سیاسی حلقوں میں اس پیشرفت کو اہم قرار دیا جا رہا ہے، جبکہ تمام بڑی جماعتیں آنے والے بلدیاتی انتخابات کی تیاریوں میں سرگرم ہو گئی ہیں۔