کانگریس کا راہول یان نہ لانچ ہوگا اور نہ لینڈ کرے گا: راجناتھ سنگھ
راجناتھ سنگھ نے کہا کہ کانگریس کا ’راہول یان'' پچھلے بیس برسوں سے لانچ نہیں پارہا ہے۔ انہوں نے کہا کہ نہ یہ لانچ ہوگا اور نہ ہی لینڈ کرے گا۔
رام دیورا (جیسلمیر): وزیر دفاع راج ناتھ سنگھ نے کہا کہ وزیر اعظم نریندر مودی کی قیادت میں ہندوستان مضبوط اور طاقتور ہوتا جا رہا ہے اور ملک میں منگل یان اور چندریان کی کامیاب لانچنگ اور لینڈنگ ہو رہی ہے جبکہ کانگریس کا ’راہول یان” پچھلے بیس برسوں سے لانچ نہیں پارہا ہے۔ انہوں نے کہا کہ نہ یہ لانچ ہوگا اور نہ ہی لینڈ کرے گا۔
راجناتھ سنگھ پیر کو جیسلمیر ضلع کے رام دیورا میں بھارتیہ جنتا پارٹی (بی جے پی) کی پریورتن سنکلپ یاترا کے تیسرے رتھ کو ہری جھنڈی دکھانے کے موقع پر منعقدہ جلسہ عام سے خطاب کر رہے تھے۔
انہوں نے کہا کہ آج ہندوستان چاند اور مریخ پر پہنچ گیا ہے اور پورے ملک نے آدتیہ ڈال-1 کے کامیاب لانچ کو دیکھا ہے۔ اس بار بھی چندریان کے اترنے کے بعد کانگریس نے دبی آواز میں سوال اٹھانے کی کوشش کی، لیکن ملک کا مزاج دیکھ کر اس نے خاموشی اختیار کی۔
انہوں نے کہا کہ ملک میں جہاں منگل یان اور چندریان کی کامیاب لانچنگ اور لینڈنگ ہو رہی ہے، وہیں کانگریس کا ‘راہول یان’ گزشتہ 20 برسوں سے لانچ نہیں ہو پارہا ہے۔ انہوں نے کہا کہ دنیا حیران ہے کہ ہندوستان نے ہالی ووڈ کی بڑی بڑی فلموں سے کم بجٹ میں منگل یان اور چندریان مشن مکمل کرلئے ہیں۔ یہ ہے نئے ہندوستان کی طاقت، اس کی آواز، جو کہتی ہے، جئے جوان، جئے کسان، جئے سائنس اور جئے تحقیق۔
راجناتھ سنگھ نے کہا، "جس زمین پر بابا رام دیورا جیسے اوتاری شخص نے سمادھی لی، اس کی مقدس سرزمین پر آپ لوگوں کے درمیان موجود ہونے پر خوشی محسوس کر رہا ہوں۔ جیسلمیر کا یہ علاقہ میرے دل میں ایک خاص مقام رکھتا ہے کیونکہ یہ پورا علاقہ صرف صحرائی سرزمین نہیں ہے بلکہ یہ بہادروں کی سرزمین اور قربانیوں کی سرزمین کے ساتھ ساتھ ہندوستان کی ایٹمی سرزمین بھی ہے۔ قریب ہی واقع پوکھران کی سرزمین ایک نہیں بلکہ پانچ پانچ ایٹمی تجربات کی گواہ ہے۔
انہوں نے کہا کہ 1971 کی ہند پاک جنگ کے دوران لونگے والا کی جنگ بھی اسی سرزمین پر لڑی گئی تھی جس میں ہندستان نے فیصلہ کن فتح حاصل کی تھی۔ انہوں نے کہا، ’’ہندوستانی فوج اور ہندوستان کے سائنسدانوں کی صلاحیتوں اور قابلیت پر کبھی کسی کو شبہ نہیں رہا۔ مجھے یقین ہے کہ ہندوستان نے 23 اگست کو مشن چندریان -3 کی کامیابی کے ساتھ ایک بار پھر اسی طرح کی چھلانگ لگائی ہے، جو اس نے 1998 میں جوہری تجربات کرکے لگائی تھی۔
مسٹر سنگھ نے کہا کہ آج یہاں رام دیورا سے شروع ہونے والی یاترا اس نئے ہندوستان کا پیغام پوری راجستھان ریاست تک لے جا رہی ہے۔ یہ یاترا جہاں نئے ہندوستان کا پیغام لے کر جا رہی ہے، وہیں یہ تبدیلی کا شنکھ بھی پھونکنے والی ہے۔ انہوں نے کہا کہ مسٹر مودی کی قیادت میں مرکزی حکومت نے پچھلے نو برسوں میں جو کام کیا ہے، نہ صرف ہندوستان کے لوگ بلکہ دنیا کے بڑے ممالک بھی ہندوستان کی طرف امید اور حسرت بھری نظروں سے دیکھ رہے ہیں۔
