اے پی میں بارش۔ مکئی، کیلا اور آم کی فصلوں کو بھاری نقصان

حیدرآباد: آندھراپردیش کے کرشنا ضلع میں آج صبح گرج چمک اور موسلا دھار بارش کے باعث کسانوں کو شدید مشکلات کا سامنا کرنا پڑا۔

اس بارش سے مکئی، کیلا اور آم کی فصلوں کو بھاری نقصان پہنچا۔ کسانوں نے فروخت کے لئے تیار دھان کے تھیلوں کو بچانے کی بھرپور کوشش کی، مگر تیز ہواؤں کے باعث ان کی محنت رائیگاں ہوگئی۔

تیز آندھی کی وجہ سے مکئی و دھان کے تھیلے بھیگ گئے۔ متاثرہ کسانوں نے افسوس کا اظہار کرتے ہوئے کہا کہ اگر حکام وقت پر ان کی دھان خرید لیتے تو انہیں یہ مصیبت نہیں جھیلنی پڑتی

۔ کسانوں نے حکومت سے فوری امداد کی اپیل کی ہے تاکہ ان کا نقصان کچھ حد تک پورا ہو سکے۔