ریونت ریڈی نے تلنگانہ کے لیے کچھ نہیں کیا، صرف جھوٹے دعوے کر رہے ہیں: جگدیش ریڈی

حیدرآباد: بی آر ایس کے سینئر رہنما اور سوریا پیٹ ایم ایل اے جگدیش ریڈی نے وزیراعلیٰ تلنگانہ ریونت ریڈی پر شدید تنقید کی۔ انہوں نے کہا کہ ریونت ریڈی نے تلنگانہ کے لیے کچھ بھی نہیں کیا اور ان کے پاس فخر سے بتانے جیسا کچھ بھی نہیں ہے۔

منگل کو تلنگانہ بھون میں بی آر ایس پارٹی لیڈران کے ساتھ میڈیا سے بات کرتے ہوئے جگدیش ریڈی نے الزام لگایا کہ ریونت صرف خیالی کارنامے گنوا رہے ہیں اور ان کی باتوں میں کوئی حقیقت نہیں ہے۔

جگدیش ریڈی نے کہا کہ ریونت ریڈی آئے دن اپنی حدیں پار کر کے جھوٹے بیانات دے رہے ہیں اور غیر شائستہ زبان استعمال کر رہے ہیں۔ انہوں نے الزام عائد کیا کہ ریونت ریڈی یہ جھوٹ پھیلا رہے ہیں کہ کے سی آر حکومت کے دوران راشن کارڈس جاری نہیں کیے گئے۔ انہوں نے واضح کیا کہ بی آر ایس حکومت کے دوران 6,47,479 نئے راشن کارڈس جاری کیے گئے تھے۔

انہوں نے طنزیہ سوال کیا: "جب ہم نے لاکھوں راشن کارڈس جاری کیے تو ریونت ریڈی کیسے کہہ سکتے ہیں کہ کچھ نہیں کیا گیا؟

نلگنڈہ میں زرعی ترقی کو اجاگر کرتے ہوئے جاگدیش ریڈی نے کہا کہ بی آر ایس حکومت نے نلگنڈہ کو دھان کی پیداوار میں ملک کا نمبر ون ضلع بنایا۔ پیداوار کو 3 لاکھ میٹرک ٹن سے بڑھا کر 40 لاکھ میٹرک ٹن تک لے جایا گیا۔ یادرادری پاور پلانٹ، تین میڈیکل کالج، اور یادرادری مندر کی ترقی سب کچھ کے سی آر حکومت کے دور میں ہوئی۔

انہوں نے سوال کیا، "ریونت ریڈی نے بطور وزیراعلیٰ ایک بھی بڑا منصوبہ شروع کیا ہے کیا؟

جاگدیش ریڈی نے کہا کہ فی الحال وہ متحدہ نلگنڈہ ضلع سے بی آر ایس کے اکیلے ایم ایل اے ہیں، لیکن اگر آج انتخابات ہوتے ہیں تو بی آر ایس 12 میں سے 12 نشستیں جیتے گی۔ انہوں نے چیلنج کرتے ہوئے کہا، "آنے والے انتخابات میں کانگریس کا ایک بھی امیدوار کامیاب نہیں ہونے دوں گا۔”