رشی سونک ایک ارب پتی جوکر: اداکارہ جمیلہ جمیل

لندن: اداکارہ جمیلہ جمیل نے برطانیہ کے وزیراعظم رشی سونک کو شدید تنقید کا نشانہ بنایا ہے جنہوں نے لوگوں کو ہڑتال پر جانے سے روکنے کی کوشش کی اور وزیراعظم بننے کے بعد انسداد ہڑتال کے قوانین متعارف کروائے۔

اپنے آفیشل انسٹاگرام اکاؤنٹ پر شی ہلک اداکارہ نے وزیراعظم رشی سونک کو ’’غیر منتخب، رابطے سے باہر، دائیں بازو کا اچھلنے والا‘‘ کہا۔ انہوں نے اپنے انسٹا گرام پوسٹ کی سرخی میں ایف ورڈ کا استعمال کیا جو یہاں دہرایا نہیں جاسکتا۔

جمیلہ نے مزید کہا کہ لوگوں کو ہڑتال کرنے سے روکنے کوشش کی جارہی ہے۔ ملک میں بگاڑ پیدا کیا جارہا ہے۔ یہ آمریت ہے قیادت نہیں۔ یہ لوگ ہڑتال کر رہے ہیں کیونکہ ان کی ملازمتوں کے لئے مناسب تنخواہ نہیں ملتی۔ یہ ارب پتی مسخرہ ان کو خاموش کرنا چاہتا ہے۔ ہم ایسا نہیں ہونے دے سکتے۔

کیپشن میں جمیلہ نے مزید لکھا کہ لوگوں کو ادائیگی کرکے ان کی حفاظت کرو جو آپ کے ملک کو فعال رکھتے ہیں۔ تارکین وطن پر الزام لگانا بند کرو۔ کیا ہم سویلا، پریتی اور رشی کو روانڈا نہیں بھیج سکتے؟

انہیں ایشیائی لوگوں کو شرمندہ کرنے میں بھی کوئی عار نہیں ہے کیونکہ یہ تین ناریل اپنی زندگی میں سفید فام لوگوں کے ساتھ ضم ہونے کے لئے کبھی زیادہ بے چین نہیں تھے۔ متعصب، فاشسٹ کتے۔

جمیلہ جمیل کون ہیں؟

جمیلہ جمیل ایک اداکارہ اور پریزنٹر ہیں۔ انہوں نے اپنے کیریئر کا آغاز پاپ کلچر سیریز کی میزبانی سے کیا۔ وہ بی بی سی ریڈیو 1 چارٹ شو کی پہلی سولو خاتون پریزنٹر تھیں۔

سال 2016 میں جمیلہ امریکہ منتقل ہوگئیں۔ انہوں نے این بی سی کی فنٹاسی کامیڈی سیریز دی گڈ پلیس میں تہانی الجمیل کا کردار ادا کیا تھا۔