500 روپے میں ایل پی جی سلنڈر بہت جلد: ریونت ریڈی

اندرویلی: تلنگانہ کے وزیر اعلی اے ریونت ریڈی نے کہا کہ ان کی حکومت کا ارادہ خواتین کو عزت کے ساتھ باوقار زندگی گزارنے میں مدد فراہم کرنا ہے۔

انہوں نے اندرویلی منڈل کے کیسلا پور گاؤں میں منعقدہ ایک پروگرام میں سیلف ہیلپ گروپس کے ارکان سے بات چیت کرتے ہوئے کہا کہ جلد ہی ایل پی جی سلنڈر 500 روپے میں دیا جائے گا۔

انہوں نے یقین دلایا کہ روزی روٹی فراہم کرنے کے لئے یونیفارم کی سلائی کا کام سیلف ہیلپ گروپوں کو تفویض کیا جائے گا۔

اس موقع پر انہوں نے ان گروپس میں 60 کروڑ روپے کے قرض تقسیم کئے جبکہ کسان پروڈیوسرز تنظیموں کو 25 لاکھ روپے جاری کئے۔ انہوں نے اس میدان میں بہترین کارکردگی کا مظاہرہ کرنے والی تنظیموں کی تعریف کی۔

بعد ازاں، انہوں نے سیلف ہیلپ گروپس کے اسٹالز کا دورہ بھی کیا اور تقریب کے دوران نمائش میں رکھی گئی مصنوعات کے بارے میں معلومات حاصل کیں۔

قبل ازیں چیف منسٹر نے کیسلا پور کے ناگوبا مندر میں پوجا کی۔ انہوں نے اندرویلی منڈل کے کیسلا پور گاؤں اور اندرویلی منڈل سنٹر میں کئی ترقیاتی پروجیکٹوں کا افتتاح بھی انجام دیا۔