ہم جنس پرستوں کی شادی ناقابل قبول، عدالت قانون نہیں بناسکتی: سپریم کورٹ

نئی دہلی: سپریم کورٹ نے آج ہم جنس پرستوں کی شادی کو تسلیم کرنے سے انکار کرتے ہوئے کہا کہ یہ اس کے دائرہ اختیار کا موضوع نہیں ہے۔ تاہم سپریم کورٹ نے اس معاملے میں مرکزی اور ریاستی حکومتوں کو کچھ ہدایات جاری کی ہیں، تاکہ ہم جنس پرست بھی معاشرے میں باعزت زندگی گزار سکیں۔

 سپریم کورٹ نے مرکزی اور ریاستی حکومتوں کو ہدایت دی کہ وہ اس بات کو یقینی بنائیں کہ ہم جنس پرست لوگوں کے ساتھ ان کے جنسی رجحان کی بنیاد پر امتیازی سلوک نہ کیا جائے۔

چیف جسٹس ڈی وائی چندرچوڑ نے حکومت کو ہم جنس پرستوں کے حقوق کے بارے میں عوام کو آگاہ کرنے اور ان کے لیے ہاٹ لائن قائم کرنے کی ہدایت دیتے ہوئے کہا کہ ہم جنس پرستی فطری ہے، جو صدیوں سے مشہور ہے۔ اس کا تعلق صرف شہری یا اشرافیہ طبقے سے نہیں ہے۔ ایسے لوگ کسی بھی طبقے میں ہو سکتے ہیں۔

ہم جنس پرستوں کو پولیس اسٹیشن بلا کر ہراساں نہیں کیا جائے

جسٹس چندرچوڑ نے پولیس کو ہدایت دی کہ وہ ہم جنس پرست جوڑے کے خلاف ان کے تعلقات کے لیے ایف آئی آر درج کرنے سے پہلے ابتدائی تحقیقات کرے۔ انہوں نے کہا، "ہم جنس پرستوں کی کمیونٹی کو محض ان کی جنسی شناخت کے بارے میں پوچھ گچھ کرنے کے لیے پولیس اسٹیشن بلا کر انہیں کوئی ہراساں نہیں کیا جائے گا۔ حکومت سے یہ بھی کہا کہ وہ اس بات کو یقینی بنائے کہ انٹر جنس بچوں کو جنس کی تبدیلی کے آپریشن کرنے پر مجبور نہ کیا جائے۔

پارلیمنٹ کا کام تبدیلی لانا ہے

سپریم کورٹ کی پانچ ججوں کی آئینی بنچ نے آج ہم جنس پرستوں کی شادی کو قانونی حیثیت دینے سے انکار کر دیا۔ چیف جسٹس نے کہا کہ عدالت قانون نہیں بنا سکتی، صرف تشریح کر سکتی ہے۔ اسپیشل میرج ایکٹ میں تبدیلی کرنا پارلیمنٹ کا کام ہے۔ انہوں نے کہا، "یہ پارلیمنٹ کو فیصلہ کرنا ہے کہ آیا اسپیشل میرج ایکٹ کی دفعات کو تبدیل کرنا ہے۔ اس عدالت کو محتاط رہنا چاہیے کہ وہ قانون سازی کے علاقے میں مداخلت نہ کرے۔”

سپریم کورٹ نے مرکز سے کہا کہ وہ ہم جنس جوڑوں کے عملی خدشات جیسے راشن کارڈ، پنشن، گریجویٹی اور وراثت کے مسائل کو دور کرنے کے لیے ایک کمیٹی کی تشکیل کی طرف بڑھے۔