سعودی حادثہ, کے ٹی راما راؤ کا متاثرہ خاندانوں سے ملاقات، بی آر ایس کی مکمل مدد کی یقین دہانی
حیدرآباد: بی آر ایس کے ورکنگ صدر کے ٹی راما راؤ نے جمعرات کے روز سعودی عرب میں پیش آئے المناک بس حادثے میں جاں بحق ہونے والے افراد کے اہلِ خانہ سے ملاقات کی اور اس یقین دہانی کے ساتھ تعزیت پیش کی کہ بھارت راشٹرا سمیتی (BRS) غمزدہ خاندانوں کی ہر ممکن مدد کرے گی۔
یہ دلخراش حادثہ 17 نومبر کو پیش آیا تھا، جس میں تلنگانہ کے 40 سے زائد افراد—جن میں زیادہ تر کا تعلق حیدرآباد سے تھا—جاں بحق ہوگئے۔
کے ٹی راما راؤ نے متوفین کے گھروں کا دورہ آدیکمیٹ، رام نگر اور ودیا نگر میں کیا۔ اہل خانہ سے ملاقات کے بعد انہوں نے گہرے رنج و غم کا اظہار کرتے ہوئے کہا کہ تلنگانہ کے تقریباً 45 افراد کی جان کا ضیاع انتہائی افسوسناک ہے، خصوصاً یہ کہ ایک ہی خاندان کے 18 افراد اس حادثے میں جاں بحق ہوئے۔
انہوں نے بتایا کہ متاثرین کے بعض رشتہ دار سعودی عرب پہنچ چکے ہیں، جبکہ بی آر ایس کی ایک ٹیم بھی وہاں بھیجی گئی ہے تاکہ مکمل تعاون فراہم کیا جاسکے۔
کے ٹی آر نے مزید کہا کہ پارٹی کا وفد سعودی عرب میں واقع بھارتی سفارت خانے کے حکام کے ساتھ مل کر کام کر رہا ہے تاکہ تمام ضروری مدد بلا رکاوٹ فراہم کی جا سکے۔
