بریانی میں مرغی کے پَر ملنے کی شکایت کے بعد فور چلیز ریسٹورنٹ پر فوڈ سیفٹی کے چھاپے, حیران کن حقائق سامنے آگئے

حیدرآباد: عثمانیہ یونیورسٹی این سی سی گیٹ کے قریب واقع فور چلیز (4 Chillies) ریسٹورنٹ میں جمعرات کی دوپہر اس وقت ہنگامہ برپا ہوگیا جب مختلف طلبہ تنظیموں کے قائدین نے بریانی میں چکن کے پر پائے جانے پر شدید اعتراض کیا۔ طلبہ کے مطابق، جب انہوں نے ریسٹورنٹ کے مالک سے وضاحت طلب کی تو اس نے نہایت لاپرواہی اور بے پروائی کا مظاہرہ کیا۔

شکایت موصول ہونے پر جی ایچ ایم سی فوڈ سیفٹی حکام فوری طور پر موقع پر پہنچے اور بریانی کے نمونے تجزیے کے لیے جمع کیے۔ بعد ازاں فوڈ سیفٹی ڈیپارٹمنٹ کے عملے نے ریسٹورنٹ کے اندرونی حصے کی تلاشی لی تو حیران کن اور افسوسناک حقائق سامنے آئے۔

حکام کے مطابق، ریسٹورنٹ کا کچن مکمل طور پر غیر صحت بخش حالت میں پایا گیا اور فریج سے سڑا ہوا چکن اور خراب میئونیز برآمد ہوئی۔ اس کے علاوہ ریسٹورنٹ کے رجسٹریشن سرٹیفکیٹ میں بھی رجسٹریشن نمبر واضح نہ ہونے پر شبہات ظاہر کیے گئے۔

شکایت کنندگان نے بتایا کہ اس ریسٹورنٹ کے خلاف ناقص اور غیر معیاری کھانے، حتیٰ کہ کھانے میں کیڑے مکوڑے پائے جانے کی متعدد شکایات پہلے بھی درج ہو چکی ہیں، لیکن متعلقہ حکام نے کوئی خاطر خواہ کارروائی نہیں کی۔ بعض طلبہ کا کہنا ہے کہ جب انہوں نے کھانے کے معیار پر سوال اٹھایا تو انہیں الٹا دھمکیاں دی گئیں۔

فوڈ سیفٹی حکام نے تصدیق کی کہ تمام اجزاء کے نمونے جمع کر لیے گئے ہیں، اور رپورٹ موصول ہونے کے بعد ریسٹورنٹ کے خلاف سخت کارروائی کی جائے گی۔