سکندرآباد: بس کا بریک فیل، کئی گاڑیوں کو ٹکر، بیوی کے سامنے شوہر ہلاک
بس ڈرائیور نے بریک فیل ہونے کے نتیجہ میں اس کا توازن کھودیا اور یہ بس، سگنل کے قریب ٹہری ہوئی گاڑیوں سے ٹکراگئی۔
حیدرآباد: تیز رفتارپرائیویٹ ٹراویلس کی بس جس کا بریک فیل ہوگیا تھا نے بائیک کو ٹکر دیدی جس کے نتیجہ میں اپنی بیوی کو مائیکے سے گھر لے جانے والا شخص بیوی کی آنکھوں کے سامنے ہلاک ہوگیا۔
اس واقعہ کے ساتھ ہی مقامی افراد اور راہگیروں نے بس کے ڈرائیور کی پٹائی کردی۔یہ خوفناک حادثہ سکندرآبادکے گوپال پورم پولیس اسٹیشن کے حدود میں کل شب پیش آیا۔
پولیس اور عینی شاہدین کے مطابق پرائیویٹ ٹراویلس کی بس شمس آباد سے میڑچل کی سمت جارہی تھی۔
کل شب وائی ایم سی اے چوراہے کے قریب سگنل کے قریب تمام گاڑیاں رک گئیں۔
اسی دوران پرائیویٹ ٹراویلس کی بس ڈرائیور نے بریک فیل ہونے کے نتیجہ میں اس کا توازن کھودیا اور یہ بس، سگنل کے قریب ٹہری ہوئی گاڑیوں سے ٹکراگئی۔بس کی رفتار زیادہ ہونے کے نتیجہ میں یہ بس بعض گاڑیوں کو گھسیٹ کر آگے لے گئی۔
اس حادثہ میں توم کنٹہ بلدیہ کے کوتہ پلی کے رہنے والے 35سالہ سندیپ گوڑ کی بس کے نیچے آنے کے نتیجہ میں موقع پر ہی موت ہوگئی۔ سندیپ گوڑ کی شادی ایک سال قبل ہوئی تھی۔
وہ اپنی بیوی جو دلسکھ نگر علاقہ میں اپنے مائیکے گئی تھی کو واپس لے جارہاتھا۔حادثہ اتنا دلخراش تھا کہ سندیپ کی موقع پر ہی موت ہو گئی۔
اس حادثہ میں دو بائیکس پر سوار تین دیگر افراد بھی زخمی ہوگئے۔پولیس نے مقدمہ درج کرکے بس ڈرائیور مہیش کو گرفتار کرلیا۔ اس واقعہ میں تین کاریں اور چاربائیکس تباہ ہوگئیں۔
حادثہ کے فوری بعد موٹر سائیکل سواروں نے بس ڈرائیور کی پٹائی کردی۔
