مغربی ایشیا میں کشیدگی بڑھنے سے سینسیکس 600 پوائنٹس گر گیا

ممبئی: مغربی ایشیا میں کشیدگی میں اضافے کے باعث بدھ کے روز گھریلو شیئر بازاروں میں گراوٹ درج کی گئی اور بی ایس ای کا سینسیکس 600 پوائنٹس ٹوٹ گیا۔

سینسیکس 85.16 پوائنٹس کی گراوٹ کے ساتھ 77,384.95 کی سطح پر کھلا۔ کچھ ہی دیر میں اس کی گراوٹ بڑھ کر تقریباً 619 پوائنٹس ہو گئی۔ خبر لکھے جانے تک یہ 558.25 پوائنٹس (0.72 فیصد) نیچے 76,911.86 کی سطح پر تھا۔

امن مذاکرات کی ناکامی کے بعد امریکہ اور ایران کے درمیان کشیدگی مزید بڑھ گئی ہے۔ ایران نے دھمکی دی ہے کہ اگر اس کی جوہری تنصیبات پر حملے ہوئے تو وہ امریکہ اور اس کے اتحادی ممالک کے مفادات کو نشانہ بنائے گا۔ اس صورتحال نے شیئر بازار میں سرمایہ کاروں کے خطرہ مول لینے کے رجحان کو کم کر دیا ہے۔

نیشنل اسٹاک ایکسچینج کا نفٹی-50 انڈیکس بھی 37.25 پوائنٹس پھسل کر 24150.45 پوائنٹس پر کھلا۔ خبر لکھے جانے تک یہ 163.90 پوائنٹس یعنی (0.68 فیصد) کی گراوٹ کے ساتھ 24,023.80 پر تھا۔

چوطرفہ فروخت کے باعث نفٹی آٹو کے علاوہ تمام انڈیکس سرخ نشان میں رہے۔ بینکنگ، فنانس، فارما، میڈیا، ریئلٹی، ہیلتھ کیئر اور سیمنٹ سیکٹرز کے انڈیکس فی الحال ایک سے دو فیصد کی گراوٹ کا شکار ہیں۔

سینسیکس میں ایئرلائن کمپنی انڈیگو کے شیئرز میں تقریباً تین فیصد کی کمی آئی ہے۔ اسٹیٹ بینک آف انڈیا، سن فارما، ایکسس بینک، ٹاٹا اسٹیل، آئی سی آئی سی آئی بینک اور ٹیک مہندرا کے شیئرز ایک سے دو فیصد کے درمیان نیچے گر گئے۔

انفوسس، ایچ ڈی ایف سی بینک، الٹرا ٹیک سیمنٹ، بجاج فنسرو، اڈانی پورٹس، کوٹک مہندرا بینک، ایل اینڈ ٹی، بی ای ایل، ٹرینٹ، آئی ٹی سی، بجاج فنانس اور ریلائنس انڈسٹریز کے شیئرز بھی نقصان میں رہے۔ جبکہ ٹائٹن اور ایٹرنل کے شیئرز میں فی الحال تیزی ہے۔