نظام آباد کا نام ضلع اندور رکھنے شیوسینا کا اعلان

حیدرآباد: شیوسینا تلنگانہ صدر ایس شیواجی نے کہا کہ ان کی پارٹی اسمبلی انتخابات میں تلنگانہ کی تمام 119 حلقوں سے مقابلہ کرے گی۔ پارٹی ہمیشہ ہندوتوا کا ساتھ دے گی۔

وہ ضلع نظام آباد کے پارٹی کارکنوں کے اجلاس کو بحیثیت مہمان خصوصی خطاب کررہے تھے۔ یہ اجلاس بودھن میں منعقد ہوا۔

انہوں نے کہا کہ آئندہ اسمبلی انتخابات میں حلقہ بودھن سے گوپی کشن شیوسینا امیدوار ہوں گے اور وہ یقینی طور پر کامیابی حاصل کریں گے۔

انہوں نے کہا کہ ضلع نظام آباد کا نام بدلنے کا کسی میں دم نہیں ہے تاہم ہماری پارٹی ضلع کی ایک اسمبلی نشست پر کامیابی حاصل کرتے ہوئے یہ کام کردکھائے گی۔ ضلع نظام آباد کا نام ضلع اندور رکھا جائے گا۔

انہوں نے مہاراشٹرا میں کے سی آر کا کوئی اثر نہیں ہے۔ کے سی آر بجائے تلنگانہ کے مسائل حل کرنے کے مہاراشٹرا میں گھوم رہے ہیں۔

ضلع صدر گوپی کشن نے کہا کہ تمام کارکنوں کو چاہئے کہ وہ پارٹی امیدوار کو کامیاب بنانے سرگرم عمل ہوجائیں۔

ایس شیواجی نے کہا کہ بودھن میں شیواجی مہاراج کا مجسمہ نصب کرنے کی پاداش میں جن پر مقدمات درج کئے گئے، پارٹی ان کی مدد کرے گی۔ اس موقع پر بودھن صدر پی بھومیش‘ صدر یووا سینا پریتم گوڑو دیگر موجود تھے۔