امریکی ریاست رہوڈ آئی لینڈ میں براؤن یونیورسٹی میں فائرنگ، 2 افراد ہلاک، متعدد زخمی

نیویارک: امریکی میڈیا رپورٹس کے مطابق امریکی ریاست رہوڈ آئی لینڈ کے شہر پروویڈنس میں واقع براؤن یونیورسٹی میں ہفتہ کی دوپہر فائرنگ کے واقعے میں کم از کم دو افراد ہلاک جبکہ کئی دیگر زخمی ہوگئے۔

پروویڈنس پولیس نے سوشل میڈیا پلیٹ فارم ایکس پر کہا براؤن یونیورسٹی کے علاقے میں متعدد افراد کو گولیاں لگیں۔

تقریباً شام چار بجکر بیس منٹ پر یونیورسٹی کے طلبہ کو ایک ٹیکسٹ پیغام موصول ہوا جس میں کیمپس میں شوٹر کی موجودگی سے آگاہ کیا گیا۔ یونیورسٹی کی جانب سے جاری الرٹ میں طلبہ کو ہدایت دی گئی کہ وہ دروازے بند کرلیں، موبائل فون سائلنٹ رکھیں اور اگلے نوٹس تک خود کو محفوظ مقام پر چھپائے رکھیں۔ الرٹ میں یہ بھی یاد دہانی کرائی گئی کہ اپنی جان بچانے کے لیے آخری چارۂ کار کے طور پر “دوڑو، چھپو یا مقابلہ کرو” کے اصول پر عمل کریں۔

پولیس کے مطابق یہ واقعہ کیمپس میں ایک تعلیمی اور تحقیقی علاقے کے قریب پیش آیا، جس کے بعد اہلکار فوری طور پر جائے وقوعہ پر پہنچ گئے۔

امریکی صدر ڈونلڈ ٹرمپ نے کہا ہے کہ انہیں اس صورتحال کے بارے میں بریفنگ دی گئی ہے اور ایف بی آئی بھی موقع پر موجود ہے۔