صحافی صدیق کپن کو اب یوپی پولیس کو رپورٹ کرنے کی ضرورت نہیں

نئی دہلی: (پی ٹی آئی) سپریم کورٹ نے پیر کے دن کیرالا کے صحافی صدیق کپن کو یو اے پی اے کیس میں ہر ہفتہ اترپردیش کے پولیس اسٹیشن میں حاضری دینے کی شرط ختم کردی۔

جسٹس پی ایس نرسمہن اور جسٹس سندیپ مہتا کی بنچ نے انہیں یہ راحت دی۔ ستمبر 2022میں صحافی کو ضمانت کی منظوری کے وقت سپریم کورٹ نے یہ شرط عائد کی تھی۔

بنچ نے کہا کہ اب درخواست گزار کو اس کی ضرورت نہیں ہے۔ صدیق کپن کو اکتوبر 2020 کو اس وقت گرفتار کرلیا گیا تھا جب وہ اترپردیش کے ہاتھرس جارہے تھے جہاں ایک دلت عورت کی مبینہ جنسی حملہ کے بعد موت واقع ہوئی تھی۔