مریال گوڑہ میں جمعیۃ العلماء کے زیرِ اہتمام SIR شعور بیداری و تربیتی اجلاس کا انعقاد

حیدرآباد: ایس آئی آر (SIR) کے بارے میں شعور بیداری اور اس کے مؤثر عملی نفاذ کے مقصد سے جمعیۃُ العلماء شاخ مریال گوڑہ کے زیرِ اہتمام ضلعی سطح کا ایک اہم تربیتی اجلاس 4 جنوری 2026، بروز اتوار منعقد ہوا۔ اجلاس صبح 10 بجے شروع ہو کر نمازِ ظہر تک جاری رہا۔

پروگرام کا آغاز مفتی ناصر حسین کی قرأتِ کلامِ پاک سے ہوا، جبکہ مولانا جاوید قاسمی نے اجلاس کے اغراض و مقاصد پر مختصر تعارفی کلمات پیش کیے۔ اجلاس کی نظامت اور کارروائی مفتی عمر قاسمی، جنرل سکریٹری جمعیۃُ العلماء مریال گوڑہ نے انجام دی، جب کہ اجلاس کی نگرانی مولانا مخدوم (نائب صدر جمعیۃُ العلماء نلگنڈہ) نے کی۔

ریاستی جنرل سکریٹری جمعیۃُ العلماء تلنگانہ حافظ پیر خلیق احمد صابر کی ہدایت پر مہمانِ خصوصی کی حیثیت سے مولانا مصدق القاسمی، صدر سِٹی جمعیۃُ العلماء گریٹر حیدرآباد نے شرکت کرتے ہوئے خصوصی خطاب کیا۔ اپنے خطاب میں انہوں نے SIR کی اہمیت، اس کے مقاصد اور زمینی سطح پر اس کے مؤثر نفاذ پر تفصیلی روشنی ڈالی اور ذمہ داران کو اس سلسلے میں منظم اور بامقصد کوششوں کی تلقین کی۔ انہوں نے کہا کہ موجودہ حالات میں SIR سے متعلق درست رہنمائی اور عملی تربیت وقت کی اہم ضرورت بن چکی ہے۔

اجلاس کے دوران اسکرین کے ذریعے تربیتی سیشن بھی منعقد کیے گئے، جن میں شرکاء کو عملی طور پر SIR سے متعلق امور کی وضاحت کی گئی اور سوال و جواب کے ذریعہ رہنمائی فراہم کی گئی۔

اس ضلعی تربیتی اجلاس میں ویمل پلی، دامرچرلہ، تپرارم اور مریال گوڑہ منڈلوں سمیت ضلع کے مختلف علاقوں کی مساجد کے صدور، ائمہ کرام اور جمعیۃُ العلماء کے ذمہ داران نے بڑی تعداد میں شرکت کی۔

اجلاس کے اختتام پر جمعیۃُ العلماء شاخ مریال گوڑہ کے ذمہ داران نے اس امید کا اظہار کیا کہ اس تربیتی پروگرام کے مثبت اثرات کے نتیجے میں مختلف علاقوں میں SIR کا کام مزید منظم، مربوط اور مؤثر انداز میں انجام دیا جائے گا۔ اجلاس دعا پر اختتام پذیر ہوا۔

اس موقع پر مولانا ولی اللہ قاسمی، مولانا عتیق، مفتی اسحاق سلیم، مولانا یعقوب، مفتی کلیم، مولانا عطا الرحمن، مولانا عبد الرشید، حافظ نواز، حافظ رفیع، حافظ اشرف، حافظ مقصود شریف، حافظ فہد، مولوی ابراہیم شریف، محمود (صدر مسجد سرائے مرتضیٰ)، حفیظ الدین پاشاہ (صدر مسجد عرفات) اور دیگر معزز شخصیات بھی موجود تھیں۔