وزیر اعظم کی تقریر پر سیتا اکا کا شدید ردعمل

حیدرآباد(منصف نیوز بیورو) ریاستی وزیر پنچایت راج وبہبود قبائل سیتا اکا نے مہاراشٹرا کے ضلع واشیم میں وزیر اعظم نریندر مودی کی تقریر پر جس میں مودی نے الزام عائد کیا تھا کہ تلنگانہ میں کسانوں کے قرضوں کو معاف نہیں کیا گیا، شدید ردعمل کااظہار کرتے ہوئے کہا کہ مودی کی تقریر من گھڑت ہے۔

سیتا اکا نے کہا کہ وزیر اعظم مودی کے دور حکومت میں کسانوں کو بے پناہ تکالیف پہونچائی گئیں۔ تین زرعی سیاہ قوانین کے خلاف احتجاج کے دوران700 کے قریب کسانوں کی موت ہوگئی۔

انہوں نے مزید کہا کہ جس شخص نے کالے قوانین متعارف کرائے اور کسانوں کو اذیتیں دیں انہیں ہماری حکومت سے سوال کرنے کا کوئی حق نہیں ہے۔

انہوں نے مودی پر انتخابی وعدوں کو پورا نہ کرنے کا الزام عائد کیا ہے۔