طوفان الاقصیٰ آپریشن فلسطینیوں کا جائز دفاع : ایرانی صدر
ایرانی صدر نے مزید کہا کہ غزہ میں صہیونی فوج نے جس قتل عام کا ارتکاب کیا ہے اس کی دنیا میں کوئی مثال نہیں ملتی، اس کے باوجود صہیونی ریاست کو کوئی فتح حاصل نہیں ہوئی۔
تہران: ایرانی صدر ابراہیم رئیسی نے طوفان الاقصیٰ آپریشن کو فلسطینیوں کا جائز دفاع قرار دے دیا۔ ایرانی میڈیا کے مطابق ایران کے صدر ابراہیم رئیسی نے کہا ہے کہ طوفان الاقصیٰ آپریشن فلسطینیوں کا جائز دفاع ہے، اس آپریشن نے اسرائیل کی برتری کو تہس نہس کر دیا۔
ایرانی صدر نے مزید کہا کہ غزہ میں صہیونی فوج نے جس قتل عام کا ارتکاب کیا ہے اس کی دنیا میں کوئی مثال نہیں ملتی، اس کے باوجود صہیونی ریاست کو کوئی فتح حاصل نہیں ہوئی۔ ابراہیم رئیسی نے غزہ میں وحشیانہ بمباری میں شہریوں کی ہلاکتوں پر سخت رد عمل میں کہا کہ عورتوں اور بچوں کو قتل کرنا بزدلی ہے، فتح نہیں۔
واضح رہے کہ اسرائیل نے حماس کے ساتھ غزہ میں عارضی جنگ بندی معاہدے پر عمل درآمد کل تک مؤخر کر دیا ہے، فلسطینی حکام کا کہنا ہے کہ اسرائیلی یرغمالیوں کی فہرست نہ ملنے کے باعث جنگ بندی میں تاخیر کی گئی ہے، جب کہ امریکہ کے سینئر اہلکار کے مطابق اسرائیل کو اب تک فلسطینی یرغمالیوں کے پہلے گروپ کے نام نہیں ملے ہیں۔
