کمال مولا مسجد کا سروے جاری، مورتی کو لندن سے لاکر عنقریب بھوج شالہ میں نصب کیا جائے گا: آشیش گوئل

دھار: ضلع دھار کے بھوج شالہ / کمال مولا مسجد کامپلکس میں کھدوائی کا عمل جاری ہے۔ آرکیالوجیکل سروے آف انڈیا(اے ایس آئی) کی جانب سے عدالت کے احکام پر سروے کیا جارہا ہے۔

ذرائع نے یہ بات بتائی اور کہا کہ کھدائی کے دوران نکلنے والی مٹی اور پتھر کو اے ایس آئی کی جانب سے محفوظ رکھا جارہا ہے۔ یہ بات سروے سے وابستہ ایک شخص نے آج یہاں بتائی اور کہا کہ سروے کا کام جو کہ 22 مارچ کو شروع ہوا‘ آج 9 ویں دن بھی جاری رہا۔

آشیش گوئل نے جو کہ ہندوؤں کی نمائندگی کرتے ہیں اور اے ایس آئی کی ٹیم کے ساتھ ہیں‘ پی ٹی آئی کو بتایا کہ سروے کا کام مسلسل جاری ہے۔ اس مقصد کے لئے عصری طریقہ کار سے استفادہ کیا جارہا ہے۔

کھدائی کے لئے گراؤنڈ پینی ٹریٹنگ راڈار (جی پی آر) گلوبل پوزیشننگ سسٹم(جی پی ایس)‘ کاربن ڈیٹنگ جیسے عصری طریقے استعمال کئے جارہے ہیں۔ اس کے علاوہ ویڈیوگرافی اور فوٹوگرافی بھی کی جارہی ہے۔

انہوں نے توقع ظاہر کی کہ ماں واگ دیوی (سرسوتی) کی مورتی کو لندن سے لاکر عنقریب بھوج شالہ میں نصب کیا جائے گا۔ انہوں نے کہا کہ ہندوؤں کی جانب سے پیش کردہ درخواست پر عدالت نے اے ایس آئی کو ہدایت دی ہے کہ وہ سروے کرے۔