تلنگانہ:بس میں آگ لگ گئی۔خاتون مسافر زندہ جھلس کرہلاک

حیدرآباد: بس میں آگ لگنے کے نتیجہ میں ایک خاتون زندہ جھلس کر ہلاک ہوگئی۔ یہ واقعہ تلنگانہ کے ضلع جوگولامباگدوال میں پیش آیا۔

تفصیلات کے مطابق کل شب ضلع کے بچوپلی کے قریب والوو پرائیویٹ بس جارہی تھی کہ اس کے ڈرائیور نے اس کا توازن کھودیاجس کے نتیجہ میں یہ بس الٹ گئی جس کے ساتھ ہی میں اس میں آگ لگ گئی۔

اس واقعہ میں بس جل کرمکمل طورپر خاکستر ہوگئی اور ایک خاتون زندہ جھلس کرہلاک ہوگئی جبکہ دیگر چار مسافرین جھلس گئے۔ ان کو علاج کیلئے اسپتال منتقل کردیاگیا۔

یہ خاتون بس سے نکلنے کی کوشش کررہی تھی کہ اسی دوران بس شعلہ پوش ہوگئی اور وہ زندہ جھلس کر ہلاک ہوگئی۔یہ بس حیدرآباد سے آندھراپردیش کے ضلع چتور جارہی تھی جس میں اس واقعہ کے وقت تقریبا 40مسافرین سوارتھے۔

بتایاجاتا ہے کہ اس حادثہ کے وقت ڈرائیورحالت نیند میں تھا۔بس کے الٹ جانے کے ساتھ ہی مسافرین اس کے شیشے توڑکر باہرنکل آئے۔