تلنگانہ: ضلع عادل آباد میں بس الٹ گئی۔خاتون جاں بحق، 35مسافرین زخمی

حیدرآباد: تلنگانہ کے ضلع عادل آباد میں پیش آئے سڑک حادثہ میں ایک خاتون جاں بحق ہوگئی اور35دیگر زخمی ہوگئے۔

یہ حادثہ ضلع کے سارنگ پورمنڈل کے محبوب گھاٹ کے قریب کل شب اُس وقت پیش آیا جب عادل آباد سے حیدرآباد جانے والی ایک پرائیویٹ ٹراویلس کی بس کے ڈرائیور نے اس کا توازن کھودیا اور یہ بس الٹ گئی۔

اس حادثہ کے وقت بس میں 50 مسافر سوارتھے۔ جاں بحق خاتون کی شناخت عادل آباد ٹاون کی رہنے والی 28سالہ فرحانہ بیگم کے طور پر کی گئی ہے۔

اس حادثہ میں فرحانہ بیگم شدید زخمی ہوگئی تھیں۔ان کو علاج کے لئے حیدرآباد منتقل کیا گیا تاہم وہ جاں بحق ہوگئیں۔تمام زخمیوں کو نرمل ڈسٹرکٹ اسپتال منتقل کر دیا گیاجہاں وہ زیرعلاج ہیں۔

بعض شدید زخمیوں کو بہتر علاج کے لئے حیدرآباد منتقل کر دیا گیا ہے۔لاپرواہی اور تیز رفتاری کے ساتھ گاڑی چلانے کے نتیجہ میں یہ حادثہ پیش آیا۔

اطلاع ملتے ہی پولیس وہاں پہنچی جس نے راحت کاموں کاآغازکیا اورحادثہ کا سبب بننے والی بس کو وہاں سے ہٹاتے ہوئے اس روٹ پر ٹریفک کو بحال کرنے کے اقدامات کئے۔پولیس نے اس سلسلہ میں ایک معاملہ درج کرکے جانچ شروع کردی۔