تلنگانہ کابینہ کی توسیع، اندرون دو دن وزیراعلی کا دورہ دہلی

حیدرآباد: وزیراعلی تلنگانہ ریونت ریڈی نے کابینہ کی توسیع پر توجہ مرکوز کردی ہے کیونکہ پارلیمنٹ کے انتخابات قریب آرہے ہیں۔

وزیر اعلیٰ دو تین دن میں دہلی کا دورہ کریں گے جہاں پارٹی کے اعلی لیڈروں سے ان کی ملاقات ہوگی۔ لوک سبھا انتخابات سے قبل کابینہ کی توسیع کو مکمل کرنے کے لیے مساعی شروع کردی جائے گی۔

نظام آباد اور عادل آباد اضلاع کو اب تک کابینہ میں جگہ نہیں ملی ہے۔ ان اضلاع کو ترجیح دینے کا امکان ہے۔ مدن موہن راؤ اور سدرشن ریڈی نظام آباد سے کابینہ میں شمولیت کیلئے دوڑ میں ہیں، پارٹی کے سینئر لیڈر پریم ساگر راؤ اور وویک برادرس عادل آباد سے دوڑ میں شامل ہیں۔

تلنگانہ میں کانگریس کی کامیابی کے بعد وزیراعلی کے طورپر ریونت ریڈی نے گزشتہ سال 9 دسمبر کو اقتدار سنبھالاتھا۔ اسی دن اطلاعات تھیں کہ نظام آباد کے سابق وزیر سدرشن ریڈی کو کابینہ میں جگہ دی جائے گی لیکن انہیں جگہ نہیں دی گئی۔

پارلیمانی انتخابی ضابطہ کے چند دنوں میں نافذ ہونے کے پس منظر میں حکومت نے کابینہ کی توسیع پر توجہ مرکوز کر رکھی ہے۔ ایسا لگتا ہے کہ دو دن میں اس پر وضاحت سامنے آجائے گی۔