وزیراعلی تلنگانہ سے امریکی ریاست ڈیلاویئرکے گورنر میٹ میئر نے ملاقات کی

حیدرآباد: وزیراعلی تلنگانہ ریونت ریڈی سے امریکی ریاست ڈیلاویئرکے گورنر میٹ میئر نے ملاقات کی جس میں دونوں ریاستوں کے درمیان مستقبل کے باہمی تعلقات اور مختلف شعبوں میں تعاون پر تفصیلی تبادلہ خیال کیا گیا۔

اس خیرسگالی ملاقات میں وزیراعلیٰ کے ہمراہ ریاستی وزیر آئی ٹی و صنعت سریدھربابو، ڈیلاویئر کی خاتونِ اول لارین میئر اور حکومت کے اعلیٰ حکام نے شرکت کی۔ ملاقات کے دوران دونوں قائدین نے دو طرفہ اقتصادی اور تکنیکی تعلقات کو مزید مضبوط بنانے پر زور دیا۔

دونوں نے تمام شہریوں کو معیاری طبی سہولیات کی فراہمی کے لئے یونیورسل ہیلتھ کیئرکے ماڈلس پر تبادلہ خیال کیا۔ تعلیمی شعبہ میں بنیادی ڈھانچہ کی بہتری اور تدریس کے جدید طریقوں کو اپنانے پر تبادلہ خیال کیاگیا۔

ٹکنالوجی کے دور میں معلومات کی حفاظت اور اس سے متعلق قوانین پر دونوں ریاستوں نے اپنے تجربات شیئر کئے۔

گورنر میٹ میئر نے ڈیلاویئر میں غریب اور متوسط طبقہ کے لئے جاری ہاؤسنگ اسکیموں اور قرض معافی کے پروگراموں کی تفصیلات بتائیں جبکہ وزیراعلیٰ نے تلنگانہ میں جاری ترقیاتی کاموں سے آگاہ کیا۔

گورنر میٹ میئر نے تلنگانہ کی تیز رفتار ترقی کی ستائش کی اور وزیراعلیٰ ریونت ریڈی کو ایک وفد کے ساتھ ڈیلاویئر کے سرکاری دورہ کی خصوصی دعوت بھی دی۔ انہوں نے امید ظاہر کی کہ اس تعاون سے دونوں ریاستوں کے درمیان اقتصادی اور تکنیکی رشتے مزید مستحکم ہوں گے۔