سرکردہ اداکار کوٹا سرینواس راؤ کو وزیراعلی تلنگانہ کا خراج

حیدرآباد: تلنگانہ کے وزیر اعلیٰ ریونت ریڈی نے سرکردہ اداکار کوٹا سرینواس راؤ کی موت پر گہرے دکھ کا اظہار کیا ہے۔ انہوں نے کہا کہ مختلف کرداروں کے ذریعہ فلمی ناظرین کا دل جیتنے والے کوٹا سرینواس راؤکی موت انتہائی افسوسناک ہے۔

وزیر اعلیٰ نے اپنے تعزیتی پیام میں کہا کہ چار دہائیوں سے زائد عرصہ تک فلمی صنعت کے لیے ان کی خدمات اور یادگار کردار ہمیشہ یاد رکھے جائیں گے۔ ان کی موت تلگو فلمی صنعت کے لیے ایک ناقابلِ تلافی نقصان ہے۔

ریونت ریڈی نے اس موقع پر کوٹا سرینواس راؤ کے ارکان خاندان سے دلی تعزیت اور ہمدردی کا اظہار کیا۔ انہوں نے یہ بھی یاد دلایا کہ کوٹا سرینواس راؤ نے 1999 میں وجئے واڑہ سے ایم ایل اے کے طور پر کامیابی حاصل کرتے ہوئے عوامی خدمت انجام دی تھی۔