تلنگانہ: 4.2 کروڑ روپے مالیت کا گانجہ ضبط،اوڈیشہ کے دوملزمین گرفتار

حیدرآباد: بین ریاستی منشیات اسمگلنگ کے نیٹ ورکس کو ایک بڑا جھٹکا دیتے ہوئے ایگل (ایلیٹ ایکشن گروپ فار ڈرگ لا انفورسمنٹ) ٹیم نے دو بین ریاستی منشیات اسمگلروں کوحیدرآباد میں گرفتار کر کے 847 کلو گرام گانجہ ضبط کیا، جس کی مالیت تقریباً 4.2 کروڑ روپے بتائی جا رہی ہے۔

پولیس کے مطابق یہ منشیات 26 تھیلوں میں بند تھیں، جن میں جملہ411 پیکٹ شامل تھے۔ اس معاملے میں اوڈیشہ سے تعلق رکھنے والے دو عادی ملزمین کو گرفتار کیا گیا۔

آپریشن کے دوران پولیس نے ایک ایس یو وی گاڑی، دو موبائل فون اور ایک تلوار بھی برآمد کی جسے ملزمین منشیات کی منتقلی کے دوران اپنی حفاظت کے لیے استعمال کرتے تھے۔

یہ کارروائی آندھرا-اوڈیشہ سرحدی علاقوں سے تلنگانہ تک سرگرم منظم منشیات اسمگلنگ کوروکنے کی سمت ایک اہم قدم قرار دی جا رہی ہے۔