چاول برآمد کرنے حکومت تلنگانہ کی فلپائن سے بات چیت

حیدرآباد(منصف نیوز بیورو) ایک اہم پیش رفت میں تلنگانہ حکومت فلپائن کو تین لاکھ ٹن دھان برآمد کرنے کے لیے بات چیت کررہی ہے۔

بات چیت کا آغاز سول سپلائز بھون میں ہوا، وزیر آبپاشی، کمانڈ ایریا ڈیولپمنٹ (آئی اینڈ سی اے ڈی) اور فوڈ اینڈ سیول سپلائیز (ایف اینڈ سی ایس) این اتم کمار ریڈی نے بات چیت کی قیادت کی۔

کمشنر آف سول سپلائیز اور ماہرین سے مشاورت کے بعد، انہوں نے فلپائن کے وزیر خوراک اور زراعت کے ساتھ ویڈیو کانفرنس کے ذریعہ بات چیت کی۔

معیار کے خدشات کی وجہ سے تعطل کے بعد تلنگانہ اور فلپائن کے درمیان چاول کی تجارت کو دوبارہ شروع کرنے پر توجہ مرکوز کی گئی۔

واضح رہے کہ فلپائن نے معیار کے مسائل کی وجہ سے بھارت سے چاول کی درآمد روک دی تھی۔ تاہم، تلنگانہ کے چاول میں نمایاں بہتری دیکھی گئی ہے، جس سے یہ حکومت سے حکومت کے درمیان برآمدی بات چیت کے لیے راہ ہموار ہوئی ہے۔

اگر معاہدہ طے پا جاتا ہے، تو یہ فلپائن کو چاول کی برآمدات کے لیے تلنگانہ کا تجارتی راستہ بحال کر دے گا۔ دونوں وزراء نے مکمل تعاون کے عزم کا اظہار کیا اور امید ظاہر کی کہ یہ معاہدہ جلد ہی طے ہو جائے گا۔