تلنگانہ: پداپلی ضلع میں غیر قانونی طورپر چاول کی منتقلی۔ پانچ لاریاں ضبط

حیدرآباد: تلنگانہ کے ضلع پداپلی کے سلطان آباد علاقہ میں واقع دو رائس ملوں سے غیر قانونی طور پر چاول منتقل کیے جا رہے تھے۔ اس سلسلہ میں ٹاسک فورس پولیس نے کارروائی کرتے ہوئے پانچ لاریاں ضبط کرلی۔

تفصیلات کے مطابق،سیول سپلایزڈپارٹمنٹ کو اطلاع ملی کہ رائس مل کے مالکان چاول کو لاریوں کے ذریعے غیر قانونی طریقہ سے منتقل کر رہے ہیں۔ اطلاع پر فوری طور پر چھاپے مارے گئے اور گاڑیوں کی تلاشی لی گئی۔

تلاشی کے دوران ان لاریوں میں تقریباً 35لاکھ روپے مالیت کا چاول موجود ہونے کی تصدیق ہوئی، جسے موقع پر ہی ضبط کر لیا گیا۔ اس کے بعد دونوں رائس ملوں میں تفصیلی جانچ کی گئی جس میں حکام کو بڑی بے ضابطگیوں کا پتہ چلا۔

جانچ میں یہ بات سامنے آئی کہ ان دونوں ملوں میں جملہ 18کروڑ 78لاکھ روپے مالیت کے 8ہزار 500سو میٹرک ٹن چاول کا غیر قانونی لین دین ہوا ہے۔ حکام نے بتایا کہ رائس مل مالکان کے خلاف مقدمات درج کیے گئے ہیں اور مزید تحقیقات جاری ہیں۔