تلنگانہ

تلنگانہ کے خاندانوں کیلئے حکومت کا بڑا اعلان، کس کو ملے گی 5 لاکھ کی مدد؟

تلنگانہ حکومت کی اندرا اماں فیملی لائف انشورنس اسکیم کا 19 نومبر کو آغاز ہوگا۔ خاندان کے کفیل کی موت پر اہل خانہ کو 5 لاکھ روپے کی بیمہ امداد فراہم کی جائے گی، جبکہ اندراج کا عمل ای شرم پورٹل کے ذریعے شروع ہوگا۔

حیدرآباد (منصف نیوز بیورو) ڈپٹی چیف منسٹر ملو بھٹی وکرامارکہ نے کہا ہے کہ ریاست کی کانگریس حکومت عوام کی فلاح و بہبود اور ہر خاندان کو معاشی تحفظ فراہم کرنے کے عزم کے تحت ایک اہم فلاحی اقدام کے طور پر ”اندرا اماں فیملی لائف انشورنس اسکیم“ شروع کرنے جا رہی ہے۔

انہوں نے بتایا کہ سابق وزیر اعظم آنجہانی اندرا گاندھی کی یوم پیدائش کے موقع پر 19 نومبر کو اس اسکیم کا باضابطہ آغاز کیا جائے گا۔ اس اسکیم کا بنیادی مقصد ایسے خاندانوں کو مالی تحفظ فراہم کرنا ہے جو اپنے گھر کے واحد یا اہم کفیل پر انحصار کرتے ہیں، تاکہ خاندان کے سربراہ یا روزی روٹی کمانے والے فرد کی اچانک موت کی صورت میں اہل خانہ کو شدید معاشی مشکلات کا سامنا نہ کرنا پڑے۔

ڈپٹی چیف منسٹر نے کہا اس اسکیم کے تحت 18 سے 59 سال کی عمر کے درمیان خاندان کے کفیل کا انتقال ہونے پر متعلقہ خاندان کو 5 لاکھ روپے کی بیمہ امداد فراہم کی جائے گی، جس سے متاثرہ خاندان کو اس مشکل وقت میں مالی سہارا مل سکے گا اور وہ اپنی بنیادی ضروریات، بچوں کی تعلیم، گھریلو اخراجات اور دیگر ضروری ذمہ داریوں کو پورا کرنے کے قابل ہو سکے گا۔

انہوں نے مزید بتایا کہ اسکیم کے تحت مستحق افراد اور خاندانوں کے اندراج کا عمل 19 نومبر سے ای شرم پورٹل کے ذریعے شروع کیا جائے گا۔ اس مقصد کے لیے ریاست کے مختلف دیہی اور شہری علاقوں میں خصوصی رجسٹریشن کیمپ بھی منعقد کیے جائیں گے، تاکہ عوام کو درخواستوں کی تکمیل اور اندراج کے عمل میں سہولت فراہم کی جا سکے۔

حکومت کی جانب سے ان کیمپوں کے انعقاد کا مقصد اسکیم کے بارے میں عوام میں شعور بیدار کرنا اور زیادہ سے زیادہ اہل خاندانوں تک اس فلاحی سہولت کو پہنچانا ہے۔ ملو بھٹی وکرمارکا نے عوام سے اپیل کی کہ وہ اس اسکیم سے متعلق معلومات حاصل کریں اور اندراج کے طریقہ کار کے بارے میں رہنمائی کے لیے اپنے قریبی منڈل پریشد ڈیولپمنٹ آفیسر، گرام پنچایت یا میونسپل آفس سے رابطہ کریں۔

انہوں نے واضح کیا کہ ریاستی حکومت کا مقصد تلنگانہ کے ہر خاندان کو سماجی اور معاشی تحفظ فراہم کرنا ہے، تاکہ کسی خاندان کے کفیل کے انتقال کی صورت میں اس کے افراد بے یار و مددگار نہ رہیں اور انہیں باوقار زندگی گزارنے کے لیے ضروری مالی مدد فراہم ہو سکے۔